काठमाडौं । केपी ओली टि२० कपमा नेपाल एपिएफ क्लबलाई ११ रनले हराउँदै मधेश प्रदेश फाइनलमा पुगेको छ । फाइनलमा मधेशले उपाधिको लागि आर्मीसँग खेल्नेछ ।
मधेशले जितको लागि दिएको १ सय ९८ रनको विशाल विजयी लक्ष्य पछ्याएको एपिएफले २० ओभरमा ९ विकेट गुमाउँदै १ सय ८६ रन बनायो । एपिएफको लागि सन्दीप जोरा र प्रदीप ऐरीले अर्धशतकिय ईनिङ खेले । जोराले ३१ बलमा ३ चौका र ५ छक्कासहित ५४ रन बनाए । प्रदीपले ४२ बलमा ३ चौका र ४ छक्कासहित ५५ रन बनाए । तेस्रो विकेटका लागि प्रदीप र सन्दीपले १ सय ६ रनको शतकीय साझेदारी गरेका थिए ।
यस्तै, लोकेश बम ३२, सुमित महर्जन १३, आसिफ शेख ४, अरुण ऐरी शून्य र पुरन बिक ४ रनमा आउट भए ।
बलिङतर्फ मधेशको लागि विशाल पटेलले सर्वाधिक ३ विकेट लिए । प्रदीप पासवान र कप्तान हरिशंकर शाहले समान २ विकेट लिए ।
त्यसअघि पोखरा रंगशालामा टस जितेर पहिला ब्याटिङ गरेको मधेशले निर्धारित २० ओभरमा ६ विकेट गुमाएर १ सय ९७ रन बनाएको थियो।
मधेशका ओपनर अनिल शाहले र इमरान शेखले उत्कृष्ट अर्धशतकिय इनिङ खेलेका थिए । अनिलले ३६ बलमा २ चौका र ६ छक्का प्रहार गर्दै ५७ रन बनाए । इमरानले ३२ बलमा ३ चौका र ४ छक्कासहित ५० रन जोडे । दोस्रो विकेटका लागि अनिल र इमरानले ९२ रनको साझेदारी गरेका थिए । पवन सरार्फ ३३, रुपेश सिंह २१, हिमान्शु दत्त १५, कप्तान हरिशंकर शाह १० तथा विशाल शुश्लिङ र मयन यादवले समान ४ रन बनाएका थिए ।
एपिएफका स्पिनर मौसम ढकालले सर्वाधिक ३ विकेट लिएका थिए भने अमरसिंह राउटेलाले २ विकेट लिए ।
