सेन्चुरियनः पाकिस्तानले दक्षिण अफ्रिका विरुद्धको चार खेलको २०–२० क्रिकेट शृंखला ३–१ ले जितेको छ । शृंखला अन्तर्गत शुक्रबार भएको अन्तिम खेलमा पाकिस्तानले दक्षिण अफ्रिकालाई ३ विकेटले पराजित गरेको छ ।
टस हारेर पहिले ब्याटिङको निम्तो पाएको अफ्रिकाले निर्धारित २० ओभरमा १९.३ ओभरमा सबै विकेट गुमाएर १४४ रनमात्र बनाउन सकेको थियो । अफ्रिकाका लागि जे मलानले ३३ र भ्यान डर डुसेनले ५२ रन बनाउनु बाहेक अन्य खेलाडी सस्तैमा आउट भएका थिए ।
पाकिस्तानी बलरहरु हसन अलि र फाहिम अश्रफले ३–३ तथा ह्यारिस राउफले २, शाहिन अफ्रिदी र मोहम्मद नवाजले समान एक एक विकेट लिएका थिए ।
१४५ रनको लक्ष्य लिएर मैदानमा उत्रेको पाकिस्तानले राम्रै शुरुआत गरेपनि जितका लागि अन्तिममा संघर्ष गर्नु परेको थियो ।
स्कोरबोर्डमा १ रन हुँदा प्रारम्भिक ब्याट्सम्यान मोहम्मद रिजवान ० रनमै आउट भएका थिए । तर त्यसपछि फखार जमानले ६० र कप्तान बाबर आजमले २४ रन बनाएर पाकिस्तानलाई सम्मानजनक स्थितिमा पु–याएका थिए ।
तर त्यसपछि पाकिस्तानी इनिङ ध्वस्त भएको थियो । मोहम्मद हाफिज १०, हैदर अलि ३, असिफ अलि ५, फहिम अश्रफ ७ रन बनाएर आउट भए । तर क्रिजमा डटेर बसेका मोहम्मद नवाजले अविजित २५ र हसन अलिले २ रन बनाएर पाकिस्तानलाई १ बल बाँकी हुँदा जित दिलाए ।
पाकिस्तानी खेलाडी फहिम अश्रफलाई प्लेयर अफ द म्याच दिइएको थियो भने पाकिस्तानी कप्तान बाबर आजमलाई प्लेयर अफ दी सिरिज घोषित गरियो । AFP
