एजेन्सी । अष्ट्रेलिया आईसीसीको एकदिवसीय वरियतामा फेरि पहिलो स्थानमा उक्लिएको छ ।
अष्ट्रेलियाले दोस्रो एकदिवसीय खेलमा दक्षिण अफ्रिकालाई १२३ रनले पराजित गर्दै शीर्ष स्थानमा पुनः कब्जा जमाएको हो । आइतबार डेभिड वार्नर (१०६) र म्यान अफ द म्याच मार्नस लाबुसचेन (१२४) को शतकको मद्दतमा अष्ट्रेलियाले १२३ रनले जित निकाल्दै पाँच खेलको शृङ्खलामा २–० को अग्रता लिएको छ ।
अस्ट्रेलियाले आठ विकेट गुमाएर ३८२ रन बनाएको थियो । यो एकदिवसीयमा टोलीको तेस्रो उच्च स्कोर हो । यसपछि अष्ट्रेलियाले दक्षिण अफ्रिकालाई ४१.५ ओभरमा २६९ रनमा अलआउट गरेको थियो ।
यो जितपछि अष्ट्रेलियाको १२१ रेटिङ अंक छ । जसअनुसार अष्ट्रेलियाले पाकिस्तानलाई पन्छाएर नम्बर एक स्थान सुरक्षित गरेको छ । पाकिस्तानको १२० रेटिङ अंक छ । भारत ११४ रेटिङ अंकसहित तेस्रो स्थानमा छ । यस्तै, न्यूजिल्याण्ड, इंग्ल्याण्ड र दक्षिण अफ्रिका क्रमशः चौंथो, पाँचौं र छैटौं स्थानमा छन् । नेपाल १५ औं स्थानमा छ ।
