एजेन्सी । वर्षाका कारण एसिया कपको रिजर्भ डेमा पनि भारत–पाकिस्तानबीचको खेलमा प्रभाव पर्ने भएको छ । कोलम्बोमा सोमबार बिहानैदेखि अविरल वर्षा भइरहेको छ ।
केही समयअघिसम्म मौसम सफा भए पनि अहिले पानी पर्न थालेको छ । यस्तो अवस्थामा रिजर्भ डेको खेलमा पनि अन्योलको अवस्था छ किनभने यहाँ शतप्रतिशत वर्षा हुने पूर्वानुमान गरिएको छ ।
एक दिनअघि आइतबार राति कोलम्बोको आर प्रेमदासा रंगशालामा यो सुपर–४ खेल भारी वर्षा र भिजेको आउटफिल्डका कारण रोकिएको थियो । आज (रिजर्भ डे)दिउँसो ३ः१५ बजेदेखि खेल सुचारु गर्ने तालिका छ ।
खेल रोकिएको अवस्थाबाट फेरि सुरु हुनेछ । खेल रोकिने बेलामा भारतले २४.१ ओभरमा दुई विकेट गुमाएर १४७ रन बनाएको थियो र यो स्कोरसँगै खेल अगाडि बढ्नेछ ।
रिजर्भ डेको खेलको अवस्था अनुसार आजको खेल ५०–५० ओभरको हुनेछ । तर, के यो खेल आज पूरा होला ? के वर्षा आज पनि बाधक बन्नेछ ? यी प्रश्न फ्यानहरुको मनमा उठिरहेको छ ।
रिजर्भ डे को खेल अवस्था पनि अन्य दिन जस्तै हुन्छ । अम्पायरहरूले पूरा ५० ओभर सञ्चालन गर्ने प्रयास गर्नेछन् । यदि वर्षाले खेल अवरुद्ध भयो भने, कम्तिमा २०–२० ओभरको खेल सञ्चालन गर्ने प्रयास गरिनेछ । खेलको नतिजाका लागि दुवै इनिङ्समा २० ओभर खेल्नुपर्ने हुन्छ । भारतले २० ओभर खेलेको छ । अब यस्तो अवस्थामा पाकिस्तानले पनि २० ओभर पूरा गर्ने प्रयास गर्नेछ ।
मानौँ भारतीय टोलीको इनिङ्सको ४० औं ओभरमा वर्षा सुरु भयो र तीन–चार घण्टापछि रोकियो भने यस्तो अवस्थामा ओभर कटौती हुन थाल्छ । अम्पायरहरूले डकवर्थ लुइस (डीएलएस) नियमको प्रयोग गरी निर्धारित ओभरमा पाकिस्तानलाई लक्ष्य दिनेछन् । मानौं पाकिस्तानले डीएलएस अन्तर्गत ३० ओभरमा केही लक्ष्य प्राप्त गर्छ ।
यदि पाकिस्तानले १५ ओभर मात्र खेले र वर्षाले अवरुद्ध गरेमा खेल हुन सक्दैन । त्यस्तो अवस्थामा २० ओभर खेल्नु पर्ने भएकाले खेल रद्द हुनेछ । त्यसैगरी यदि पाकिस्तानी टोलीले २१ ओभर खेले र त्यसपछि वर्षाका कारण अवरुद्ध भई खेल्न नसकेमा डकवर्थ लुइस नियमको प्रयोग गरी खेलको नतिजा टुंगो लगाइन्छ ।
सुपर फोर चरणको खेल जित्ने टोलीले दुई अंक पाउँछ । साथै, वर्षाले अवरुद्ध भए तथा बराबरीमा रोकिएमा दुवै टोलीले एक–एक अंक बाँड्छन् । पाकिस्तानले सुपर फोरमा यसअघि नै एक खेल जितेको छ । उसले सुपर फोरको पहिलो खेलमा बंगलादेशलाई पराजित गरेको थियो । यस्तो अवस्थामा पाकिस्तानी टोलीले यो खेल जित्यो भने उसको चार अंक हुनेछ र फाइनलमा उसको स्थान लगभग पक्का हुनेछ ।
यसैगरी, वर्षाले खेल अवरुद्ध गरेमा दुवै टोलीले एक–एक अंक बाँडेमा पाकिस्तानको तीन अंक हुनेछ । फाइनलमा पुग्ने उसको दाबी बलियो हुनेछ । अर्कोतर्फ भारतले यो खेल जित्यो भने दुई अंक पाउनेछ । फाइनल पुग्ने उसको दाबी बलियो हुनेछ । भारतले सेप्टेम्बर १२ मा श्रीलंकासँग र १४ सेप्टेम्बरमा बंगलादेशसँग खेल्ने छ ।
वर्षाले खेल प्रभावित बनाएमा भारतले एक अंक पाउनेछ र यस्तो अवस्थामा उसको बाटो कठिन हुनेछ । उसले आफ्ना आगामी दुवै खेल जित्नुपर्नेछ किनभने श्रीलंकाले एक खेलमा जित हासिल गरिसकेको छ ।
