काठमाडौं । राष्ट्रिय महिला फुटबल टिमकी फरवार्ड सावित्रा भण्डारी आज स्वदेश फर्कने भएकी छिन् ।
सावित्रा घुँडामा लागेको चोटको उपचारका लागि कतार गएकी थिइन् ।
अखिल नेपाल फुटबल संघ (एन्फा) ले सावित्रा मंगलबार साँझ ७ः३५ मा नेपाल आइपुग्ने जानकारी दिएको छ ।
राष्ट्रिय टिमकी मुख्य फरवार्ड सावित्राले महिला लिग दौरान चोट बोकेपछि कतारको दोहास्थित अस्पेटार अस्पतालमा सावित्राको चोटको सफल शल्यक्रिया गरिएको थियो ।
विभागीय टिम एपीएफबाट खेल्ने क्रममा सावित्राको दाँया खुट्टाको एन्टेरिएर क्रुसिएट लिगामेन्ट (एसिएल) च्यातिएको थियो ।
एन्फाको पहल र कतार फुटबल संघको सहयोगमा सावित्राको उपचार अस्पेटार अस्पतालमा गरिएको हो ।
यसअघि एन्फाकै पहलमा राष्ट्रिय फुटबल टिमका मिडफिल्डर बिक्रम लामा र फरवार्ड बिमल घर्तिमगरले कतारमा उपचार गरेका थिए ।
