काठमाडौँ । कृषि गणना २०७८ अनुसार २६.७ प्रतिशत कृषकले तरकारी खेतीमा विषादीको प्रयोग गर्ने गरेका छन् ।
बिहीवार सार्वजनिक गरिएको सातौं कृषि गणनाअनुसार नेपालमा तरकारी बाली लगाउने कृषकको परिवारसंख्या जम्मा १९ लाख ७७ हजार ५ सय ७१ रहेका छन् । जसमा ५ लाख २८ हजार १२ परिवारले तरकारीमा विषादीको प्रयोग गर्दै आएका छन् ।
त्यस्तै ३ हजार ६ सय ९७ परिवारले तरकारीमा अध्यधिक कडा विषादीको प्रयोग गर्दै आएको तथ्याङ्कमा देखिएको छ । कार्यालयले सार्वजनिक गरेको विवरण अनुसार भक्तपुर, काभ्रे र तराईका सीमा क्षेत्रमा जिल्लाहरुमा लगाइएको तरकारीमा अध्यधिक कडा विषादीको प्रयोग गर्ने गरेको पाईएको छ ।
यस्तै, कार्यालयको अनुसार कूल तरकारी लगाउने कृषकको संख्या मध्ये ७३.३ प्रतिशतले तरकारीमा विषादीको प्रयोग गर्दैनन् ।
कृषि गणना २०७८ अनुसार नेपालमा जम्मा घर परिवारमध्ये ६२ प्रतिशत मात्रै कृषक परिवार रहेका छन् । नेपालका करिव ४० लाख परिवार खेतीपातीमा आवद्ध रहेका छन्। जसमा ३९ लाख ९९ हजार परिवारले खेतीपाती गरेका छन् भने एक लाख ३२ हजारले पशुपंक्षी पालन गरेका छन् ।
