एजेन्सी । विश्व फुटबलको प्रतिष्ठित खेलाडी अवार्ड बालोन डी’ओरका लागि ३० जना खेलाडीलाई समावेश गर्दै मनोनयन सूची सार्वजनिक गरिएको छ ।
उक्त सूचीमा हाल साउदी अरबको क्लब अल नासरबाट व्यवसायिक फुटबल खेलिरहेका पाँचपटक उक्त अवार्डका विजेता रहेका क्रिस्टियानो रोनाल्डो भने अटाएका छैनन् । रोनाल्डोले सन् २००८, २०१४, २०१५, २०१६ र २०१७ मा यो अवार्ड प्राप्त गरेका थिए ।
रोनाल्डो सन् २००३ पछि पहिलोपटक मनोनयनमै नपरेका हुन् । उनी गत सिजन इङ्लिस क्लब म्यानचेस्टर युनाइटेड छाडेर अल नासरमा आबद्ध भएका थिए । ३० खेलाडीको सूचीमा लियोनल मेसी, एर्लिङ हालाण्ड केलियन एमबाप्पे लगायत छन् । हरेक वर्ष एक खेलाडीलाई बालोन डी’ओर प्रदान गरिँदै आएको छ ।
मेसीले यो अवार्ड सर्वाधिक ७ पटक जितेका छन् । यसपटक हालाण्ड र मेसीलाई प्रमुख दावेदारको रुपमा हेरिएको छ । हालाण्डले गत सिजन म्यानचेस्टर सिटीलाई युरोपियन च्याम्पियन्स लिग र प्रिमियर लिग र एफए कप गरी ट्रेबल उपाधि जिताएका थिए । मेसीले भने गत वर्ष अर्जेन्टिनालाई विश्वकपको उपाधि दिलाएका थिए ।
