जेन्सी । एसिया कपमा समुह चरणअन्तर्गतको अन्तिम खेलमा अफगानिस्तानलाई दुई रनले हराउँदै श्रीलंका सुपर फोरमा पुगेको छ ।
समूह बी बाट अपराजित रहँदै श्रीलंका सुपर फोरमा पुगेको हो । यससँगै, अफगानिस्तान समूह बी र नेपाल समूह ए बाटै बाहिरिने टोली बनेका छन् ।
श्रीलंकाबाट जितको लागि २ सय ९२ रनको लक्ष्य पाएको अफगानिस्तान ३७.४ ओभरमा २ सय ८९ रन बनाउदै अल आउट भयो । अफगानिस्तालाई सुपर फोरमा पुग्न उक्त लक्ष्य ३७.१ ओभरमा पुरा गर्नुपर्थ्यो। ३६ औ ओभरको समाप्तीमा अफगानिस्तानलाई सुपर फोरमा पुग्न एक बलमा तीन रन चाहिँएको थियो ।
३७.१ ओभरमा मुजिब उर रहमानलाई श्रीलंकाका स्पिनर धनन्जय डि सिल्भाले सदिराबाट क्याच गराएपछि अफगानिस्तानको सुपर फोरको सम्भावना लगभग सकिएको थियो । तर बाँकी तीन बलमा एक छक्का हान्न सके अफगानिस्तान सुपर फोरमा पुग्न सक्थ्यो । धनन्जयले दोस्रो र तेस्रो बल लगातार डट फाले र चौथो बलमा फारुकीलाई एलबीडब्लू आउट गराए । र विजयी हुँदै श्रीलंका सुपर फोरमा पुग्यो ।
अफगानिस्तानका मोहम्मद नाबीले सर्वाधिक ६५ रन बनाए। नाबी अफगानिस्तानबाट ओडिआईमा सर्वाधिक छिटो अर्धशतक प्रहार गर्ने खेलाडी बने । उनले २४ बलमा अर्धशतक बनाउदै मुजिब उर उरमानले २६ बलमा पाकिस्तानविरुद्ध हानेको अर्धशतकको कीर्तिमान तोडेका हुन् ।
यस्तै, कप्तान हश्मातुल्लाह शाहिदी ५९, नाजिबउल्लाह जद्रान २३, गुलबदीन नाइब २२, ओपनर रहमानउल्लाह गुरबाज ४ रइबाहिम जद्रानले ७ रन बनाउँदा राशिद खान २७ रनमा नट आउट रहे ।
श्रीलंकाका कसुन रजिथाले सर्वाधिक ४ विकेट लिए । दुनिथ वेलालेगे र धनन्जय डि सिल्भाले समान दुई विकेट लिए ।
त्यसअघि गद्दाफी स्टेडियम लाहोरमा टस जितेर पहिला ब्याटिङ गरेको श्रीलंकाले निर्धारित ५० ओभरमा ८ विकेट गुमाउँदै २ सय ९१ रन बनाएको थियो । श्रीलंकाका विकेटकिपर कुशल मेन्डिसले सर्वाधिक ९२ रनको योगदान दिए ।
ओपनर पाथुम निसांका ४१, दीमुथ करुणारत्ने ३२, सदिरा समाराविक्रामा ३, चरिथ असलंका ३६ र दासुन शानका ५ रनमा आउट भए । अन्तिम बलमा आउट भएका महेश थिक्सेनाले २८ रन बनाउदा दुनिथ वेलालागे ३३ रनमा नट आउट रहे ।
अफगानिस्तानका तीव्र गतिका गुलबदीन नाइबले ४ विकेट लिए । राशिद खानले २ विकेट लिए भने मुजिब उर रहमानले १ विकेट लिए ।
समूह ए बाट पाकिस्तान शीर्ष र भारत दोस्रो स्थानमा रहँदै सुपर फोरमा पुगेका छन भने समूह बी बाट श्रीलंका शीर्ष र बंगलादेश दोस्रो स्थानमा रहँदै सुपर फोरमा पुगे।
सुपर फोरको पहिलो खेलमा आज बंगलादेश पाकिस्तानबीच प्रतिष्पर्धा हुनेछ ।
