काठमाडौँ । प्रतिनिधि सभाका सभामुख देवराज घिमिरेले नेपाल विश्वकै सुन्दर मुलुकहरुको सूचिमा सबैभन्दा अगाडि हुने सम्भावना बोकेको देश भएको बताउनुभएको छ ।
सभामुख घिमिरेले नेपाललाई विश्वकै सुन्दर देशको अग्रणी बनाउन त्यसै अनुसारको अध्ययन, विश्लेषणको जरुरी रहेको पनि बताउनु भयो । शुक्रवार ललितपुरस्थित महालक्ष्मी नगरपालिकाले लाँकुरी भञ्ज्याङमा स्थापना गरेको मनमोहन मेमोरियल टावर परिसरमा लागिगुँरास फूलको बिरुवा रोपेपछि उहाँले सञ्चारकर्मीमाझ नेपाल सुन्दर देश भएपनि त्यसलाई अगाडि बढाउने गरी अध्ययन र अनुसन्धानको पाटोमा काम हुन नसकेको बताउनु भयो ।
सभामुख घिमिरेले लाँकुरी भञ्ज्याङ क्षेत्रलाई पर्यटकीय क्षेत्रको रुपमा विकास गर्ने अभियान चलाएको भन्दै महालक्ष्मी नगरपालिकाप्रति खुशी व्यक्त गर्दै यसले मुलुकलाई समृद्ध बनाउन र पर्यटनमार्फत समृद्धि योजना बनाउन पनि मार्ग प्रशस्त गर्ने विश्वास व्यक्त गर्नुभयो । उहाँले नेपालप्रतिको आकर्षण, आम्दानी बढाउन सो क्षेत्रले महत्वपूर्ण भुमिका निर्वाह गर्ने भएकाले महालक्ष्मी महानगरपालिकाले सो क्षेत्रलाई पर्यटकीय क्षेत्रको रुपमा विकास गर्ने अभियान चलाएको बताउनु भयो ।
सभामुख घिमिरेले भन्नुभयो, ‘संसारको सुन्दर मुलुकहरुमा सबभन्दा अगाडि नेपाल हुनसक्छ । तर, त्यही ढंगको अध्ययन गर्ने, हेर्ने, विश्लेषण गर्ने भईरहेको छैन । अहिले महालक्ष्मी नगरपालिकाले यो क्षेत्रलाई एउटा पर्यटनको हिसावले आकर्षक क्षेत्रको रुपमा विकास गर्ने जे शुरुवात गरेको छ । यो राष्ट्रकै हीतको लागि, राष्ट्रलाई नै आकर्षण गर्नका लागि, राष्ट्रलाई समृद्ध बनाउनका लागि नेपाली जनता र नेपाली जातिहरुले गौरव गर्ने चिजको रुपबाट विकास गर्ने शुरुवात हो भन्ने मलाइ लाग्दछ ।’
‘यो शुरुवातलाई सबै पक्षबाट सहयोग गरेको खण्डमा काठमाडौंको यो प्रदुषण, काठमाडौंको यो बाल्लो बस्ती र त्यसलाई यहाँ आएर लिने मनारञ्जन र संसारभर यस्ता ठाउँहरु, यो जैविक विविधता, अनेक खालको रुख, विरुवाहरु, यहाँको हावापानीहरु, यसलाई जोगाउने कुरा यसलाई हेर्नका लागि पनि ठूलो धुईरो लाग्न सक्छ । र, यसले देशको विकासमा महालक्ष्मीले योगदानहरु गर्नसक्छ भन्ने मलाई लाग्दछ । र, यी नजिक गणेशमान सिंहको नाममा भएको पार्क, त्यसले आकर्षण दिइरहेको छ भने त्यसलाई कम्पिटिशन गर्दै यो आइरहेको छ ।’
‘यस प्रकारको कम्पिटिसनले आकर्षण बढाउने, आम्दानी बढाउने र यसलाई अन्त प्रेरणा लिने ठाउँको रुपमा विकास हुन सक्छ । त्यसको लागि यहाँको मेयरज्युको मुख्य दायित्वको कुरा छ भने प्रदेशसभाका माननीयज्युहरु, प्रतिनिधि सभाका माननीयज्युहरु र खासगरी यहाँका लोकल जनसमुदायहरु, यहाँको सामुदायिक वन, वनका रक्षक जनताहरु । यी सबैले यसलाई त्यसरी लैजानुपर्छ । त्यो ठाउँ आज हेर्न पाउँदाखेरी धेरै खुशी लागेको छ ।’
महालक्ष्मी नगरपालिकाले काठमाडौं उपत्यकाको नजिकै रहेको लाँकुरी भञ्ज्याङ क्षेत्रलाई पर्यटकीय क्षेत्रको रुपमा विकास गर्नेगरी त्यस क्षेत्रमा गणेशमान सिंह स्मृति पार्क बनाइएको छ । अहिले मनमोहन मेमोरियल टावर पनि निर्माण गरिएको छ । नगरपालिकमा मेयर हरिगोविन्द श्रेष्ठले सो क्षेत्रलाई पर्यटकीय क्षेत्रको रुपमा विकास गर्ने अभियान अन्तर्गत आगामी माघमा ‘लाँकुरी भञ्ज्याङ वर्ष’ मनाउने योजना पनि तय गरिएको बताउनु भयो । उहाँका अनुसार सो नगरपालिकाले त्यहाँको विकासका लागि राष्ट्रिय विभूतिहरुको स्मृति पार्कहरुलाई निर्माण गर्दै लैजानेछ ।
यसले काठमाडौं उपत्यका र यस क्षेत्रको पर्यटन र पर्यावरणमा मात्रै योगदान नदिई नेपालको समृद्धिमात्रै महत्वपूर्ण योगदान पुर्याउने महालक्ष्मी नगरपालिकाको बुझाई छ ।
