काठमाडौं । जनता समाजवादी पार्टी (जसपा) नेपालका अध्यक्ष महन्थ ठाकुर र नेता राजेन्द्र महतोले आज राष्ट्रपति विद्यादेवी भण्डारीलाई भेट गर्नुभएको छ ।
राष्ट्रपति भण्डारीले दुई वा दुई भन्दा बढी दलको सर्मथनमा सरकार गठन गर्न ३० वैशाखको साँझ ९ बजेसम्म समय दिँदै गर्दा उहाँहरूले शीतल निवास गएर राष्ट्रपति विद्यादेवी भण्डारीलाई भेट्नुभएको हो ।
उहाँहरु दुबैले जसपाको प्रथम अध्यक्ष ठाकुर भएको र निर्वाचन आयोगमा पनि प्रथम अध्यक्षकै हस्ताक्षर चल्ने भन्दै अरु कोही आए वैधता नदिन राष्ट्रपति समक्ष आग्रह गर्नुभएको स्रोतले बताएको छ ।
जसपाको अर्का पक्ष उपेन्द्र यादव बाबुराम समूह विपक्षी गठबन्धलाई सहयोग गर्नुपर्ने अडानमा छ । ठाकुर पक्ष प्रधानमन्त्री केपी शर्मा ओलीलाई विश्वासको मत दिँदा तटस्थ बसेको थियो भने अर्को पक्षले विपक्षमा मतदान गरेको थियो ।
शीतल निवास जानुअघि ठाकुर र महतोले बालुवाटारमा गएर प्रधानमन्त्री केपी ओलीसँग छलफल गर्नुभएको थियो । छलफलमा विपक्षी गठबन्धनलाई बहुमत पुग्न नदिने रणनीतिबारे छलफल भएको बताइएको छ ।
