काठमाडौँ । नेकपा (माओवादी केन्द्र)का अध्यक्ष एवं प्रधानमन्त्री पुष्पकमल दाहाल प्रचण्डले पार्टीका सांसदहरुलाई संसदमा प्रभावकारी भूमिका निभाउन निर्देशन दिएका छन् ।
सोमबार बसेको माओवादी संसदीय दलको बैठकपछि सञ्चारकर्मीसँग बोल्दै पार्टीका प्रमुख सचेतक हितराज पाण्डेले अध्यक्ष प्रचण्डले यस्तो निर्देशन दिएको जानकारी गराएका हुन् ।
प्रचण्डको भनाइ उदृत गर्दै पाण्डेले भने, ‘दलका नेता समेत रहनुभएका प्रधानमन्त्रीले संघीय संसदमा सांसदहरुको भूमिका थप प्रभावकारी बनाउन निर्देशन दिनुभयो । साथै संसदीय समितिका सभापति चयनका बारेमा समेत बिफिङ गर्नुभयो ।’
बैठकमा सत्ता र प्रतिपक्षी सबै दलहरूसँग संसदको अवरोध हटाउन छलफल गर्ने निर्णय गरेको पाण्डेले बताए । उनले भने,’संसद खुलाउन प्रमुख प्रतिपक्ष दलका नेतासहित अन्य दलका नेतासँग छलफल गरेर ठोस निष्कर्ष निकालिन्छ र संसद अवरोध हट्छ भन्ने हामीलाई विश्वास छ । ’
बैठकमा उपाध्यक्ष समेत रहेका उपप्रधान तथा गृहमन्त्री नारायणकाजी श्रेष्ठले सरकारले तीनवटा विधेयक (संघीय शिक्षा ऐन, निजामति कर्मचारी र प्रहरी सम्बन्धि विधेयक) दर्ता गर्ने तयारीमा रहेको जानकारी गराएका छन् ।
