काठमाडौं । उपप्रधानमन्त्री एवम् गृहमन्त्री नारायणकाजी श्रेष्ठले त्रिभुवन अन्तर्राष्ट्रिय विमानस्थलको भन्सार पास गरि बाहिरिएको सुनकाण्डको अनुसन्धान गर्दै जरासम्म पुग्ने बताएका छन् ।
प्रहरी प्रमुखसँगै विमानस्थल भन्सार कार्यालयको अनुगमनपछि पत्रकारहरुलाई प्रतिक्रिया दिँदै मन्त्री श्रेष्ठले यस काण्डको सम्पूर्ण नेक्सस केलाउने बताए ।
गृहमन्त्री श्रेष्ठले भविष्यमा यस्ता घटना दोहरिन नदिन योजना बनाएर अघि बढ्ने बताए । उनले भने, ‘छानबिन र अनुसन्धानको प्रक्रियालाई यसको जरैसम्म पुग्ने गरी अगाडि बढाउनुपर्छ । जस्तोसुकै र जसोसुकै भए पनि यसको नेक्सस र गुटमा पुग्ने गरी कारबाहीको प्रक्रिया अघि बढाउँछौं ।’
पत्रकारले भ्रष्टाचारको जरो उच्च राजनीतिक तहसम्म रहेको चर्चाबारे जिज्ञासामा मन्त्री श्रेष्ठले जुनसुकै पार्टीको भए पनि उन्मुक्ति नपाउने बताए । उनले भने, ‘भ्रष्टाचारको कुरा वा अपराधका घटनाका सम्बन्धमा अनुसन्धान गर्दाखेरि कुनै कोट, कुनै टार, कुनै पार्टी मलाई मतलब छैन’।
मन्त्री श्रेष्ठले यसबारे प्रधानमन्त्री पुष्पकमल दाहाल प्रचण्डसँग कुराकानी भएको र छानबिनमा राज्यका अरु निकायहरुले पनि सघाउने विश्वास व्यक्त गरे ।
