काठमाडौँ । प्रधानमन्त्री पुष्पकमल दाहाल प्रचण्डले सम्बोधन गरेर संसद्को दुवै सदनको अवरोध हटाउने समझदारी भएको छ ।
प्रधानमन्त्री प्रचण्ड, प्रमुख प्रतिपक्षी दल नेकपा (एमाले) का नेता केपी शर्मा ओली र नेपाली कांग्रेसका सभापति शेरबहादुर देउवाबीच संसद्को अवरोध हटाउने विषयमा समझदारी बनेको छ ।
प्रधानमन्त्रीको अनुरोधमा आइतबार १ बजे बस्ने भनिएको प्रतिनिधिसभाको बैठक ३ बजे बस्ने भएको छ । प्रधानमन्त्री प्रचण्डले ३ बजेको उक्त बैठकलाई सम्बोधन गरेर प्रतिनिधिसभा बैठक अगाडि बढाउने समझदारी भएको बताइएको छ ।
प्रधानमन्त्रीले आफ्ना कुरा राखेर सदनको अवरोध हटाउने समझदारी भएको छ । असार १८ गते प्रधानमन्त्री प्रचण्डले दिएको अभिव्यक्तिलाई लिएर एमालेले प्रधानमन्त्रीको राजीनामा मागेको थियोे ।
प्रधानमन्त्री दाहालका स्वकीय सचिव रमेश मल्लका अनुसार शीर्ष नेताबीचको छलफल सकारात्मक भएको जानकारी दिएका छन् ।
कांग्रेसका मुख्य सचेतक रमेश लेखकले पनि प्रधानमन्त्रीले बैठकको सुरुमा बोल्ने र संसद् सुचारु राख्ने विषयमा समझदारी बनेको जानकारी दिनुभयो ।
