काठमाडौँ । राष्ट्रिय स्वतन्त्र पार्टी (रास्वपा) का सभापति रवि लामिछानेले लोकतान्त्रिक पद्दतिमा विश्वास गर्न आग्रह गर्नुभएको छ ।
चितवनको नयाँ किरण कमलकुसुम केन्द्रमा झडप भएपछि फेसबुक लाइभमार्फत स्वच्छ प्रतिस्पर्धा गर्न र भयरहित मतदान गर्ने वातावरण बनाउन उहाँले आग्रह गर्नुभयो ।
चितवन क्षेत्र नं २ मा रास्वपाका तर्फबाट प्रतिनिधिसभा सदस्य उपनिर्वाचनको उम्मेदवारसमेत रहुनभएका लामिछानेले चितवनमा आफूमाथि हुलहुज्जत भएपछि तत्काल आफूलाई मतदानस्थलमा जाने अवस्था नरहेको बताउनुभयो ।
एउटा माघले जाडो नजाने भन्दै उहाँले अन्य पार्टीलाई चितवनका जनताले हेरिरहेको बताउनुभयो । आफ्ना नेता कार्यकर्ता तथा प्रतिस्पर्धी दलहरुलाई पनि भयरहित निर्वाचन गराउन ध्यानाकर्षण गराउँदै सभापति लामिछानेले आफ्नो पार्टीबाट बुथमा खटिएका कार्यकर्तालाई पनि उत्तेजित नहुन विशेष आग्रह गर्नुभयो ।
लामो इतिहास बोकेका दलहरुले हुलहुज्तमा विश्वास गर्दैनन् भन्दै उहाँले भन्नुभयो, “जुन किसिमको घटना भएको छ, यसलाई जनताले हेरेका छन् । सामान्य स्वागतको कुरा थियो । हामी झडप र गुण्डागर्दीमा विश्वास गर्दैनौँ ।”
उपनिर्वान मतदानका क्रममा आइतबार चितवनको नयाँ किरण कमलकुसुम माध्यमिक विद्यालय मतदान केन्द्रमा दुई पक्षबीच झडप भएको थियो ।
