काठमाडौँ । राष्ट्रिय स्वतन्त्र पार्टी (रास्वपा) का सभापति रवि लामिछानेमाथि हुलहुज्जत भएपछि चितवन निर्वाचन क्षेत्र नं २ अन्तर्गत भरतपुर महानगरपालिका–११ स्थित नयाँ किरण माध्यमिक विद्यालयमा मतदान स्थगित भएको छ ।
मतदान केन्द्रको अवलोकन गर्न जाने क्रममा केही व्यक्ति लामिछानेमाथि जाइलागेको बताइएको छ । लामिछाने आफ्ना केही सहयोगीसहित उक्त विद्यालयको बुथतर्फ जाँदा त्यहाँ रहेका समर्थकहरुले उहाँको पक्षमा नाराबाजी गरेपछि विपक्षी दलका कार्यकर्ताहरुले प्रतिकार गरेका थिए ।
लामिछानेका समर्थकहरुले ‘रवि दाइ हाइ हाइ’ गर्दै नाराबाजी भएपछि ‘के को हाइ हाइ?अहिले नाराबाजी गर्न पाइन्छ ? आचारसंहिता लाग्दैन ?’ भन्दै केही युवाहरुले हुलहुज्जत गरेका थिए । त्यसपछि प्रहरीले लामिछानेलाई सुरक्षा दिएर लगेको थियो भने हुलहुज्जत गर्ने युवाहरु र प्रहरीबीच झडपसमेत भएको थियो ।
रास्वपाका केन्द्रीय सदस्य दीपक बोहेराले त्यसबेला सामाजिक सञ्जालमा प्रत्यक्ष प्रसारण गरिरहँदा एक कार्यकर्ताले उनको मोबाइल खोसेर फ्याकिदिएको सार्वजनिक भिडियोमा देखिन्छ ।
चितवन क्षेत्र नं २ का उम्मेदवारसमेत रहेका लामिछानेलाई कुनै चोटपटक नलागेको बोहोराले बताउनुभयो । उहाँले त्यहाँ पार्टीका तर्फबाट कुनै नाराजुलुससमेत नगरिएको न्युजपोलारलाई बताउनुभयो ।
“हामी हिँडिरहेकामात्र थियौँ । सभापतिज्यूले सबैलाई अभिवादन फर्काइरहनुभएको थियो । बाटोमा बसिरहेकाहरुले उहाँको समर्थनमा नारा लगाउनुभयो । हामी उहाँहरुलाई नारा नलगाउन भनिरहेका थियौंं । त्यत्तिकैमा आक्रमण भयो”, उहाँले भन्नुभयो ।
त्यहाँ अहिले तनाव भएपछि मतदान रोकिएको छ । मतदान सुचारु गर्न सर्वदलीय बैठकको आह्वान गरिएको बताइएको छ ।
