इनरुवा । स्थानीय प्रशासनले इनरुवामा हुने पूर्वराजा ज्ञानेन्द्र शाहको नागरिक अभिनन्दन कार्यक्रममा राखिएका केही ब्यानर हटाउन लगाएको छ । आयोजकले जिल्ला प्रशासन कार्यालयको आदेशमा ‘श्री ५ महाराजाधिराज’ लेखिएका ब्यानर हटाएको छ ।
पूर्वराजा ज्ञानेन्द्रको नागरिक अभिनन्दन कार्यक्रमका विषयमा हिजो साँझ आयोजक र स्थानीय प्रशासनबीच भएको बैठकमा सरकारी अधिकारीहरूले ‘गणतन्त्रमा महाराजाधिराज नहुने’ भन्दै ब्यानर हटाउन माथिबाट दबाब आएको बताएका थिए । उनीहरूको सो भनाइपछि आयोजक ब्यानर हटाउन सहमत भएको हो ।
यस्तै अभिनन्दन कार्यक्रमका लागि आयोजकलाई जिप्रकाले लिखित अनुमतिसमेत नदिएको बताइएको छ । आयोजकका तर्फबाट अनुमति मागिएपछि जिप्रकाले ‘माथि’ जानकारी गराएको तर माथिको निर्देशनअनुसार जिप्रकाले अनुमति नदिएको हो । यद्यपि प्रमुख जिल्ला अधिकारी र आयोजकबीच मौखिक समझदारी भएअनुसार कार्यक्रम गर्न लागिएको हो ।
प्रशासनले कार्यक्रमका लागि सुनसरीको इनरुवा क्षेत्रमा सुरक्षा अवस्था कडा बनाएको छ । इटहरीदेखि नै सडकमा सुरक्षाकर्मीको उपस्थिति बाक्लो रहेको छ । प्रदेशको नामकरणका विषयमा लिएर कोशी प्रदेशमा आन्दोलन भइरहेको र पूर्वराजासमेत पहिचानवादीको तारोमा पर्नसक्ने भन्दै सुरक्षाकर्मीले सुरक्षा जाँचलाई कडा बनाएको हो ।
त्यस्तै स्थानीय प्रशासनले पूर्वराजालाई सडकमा पैदल हिँड्नसमेत सुरक्षाको कारण देखाउँदै रोक लगाएको बताइएको छ । सडकमा सुरक्षा दिन नसक्ने बताए पछि आयोजकले उहाँलाई सिधै कार्यक्रम स्थलमा लैजाने तयारी गरेको छ ।
राष्ट्रिय प्रजातन्त्र पार्टी (राप्रपा) का प्रवक्ता मोहन श्रेष्ठले सामाजिक सञ्जालमा स्टाटस लेख्दै सरकारी कदमको विरोध गरेका छन् ।
“काठमाडौँमा जनआवाजलाई हत्केलाले थुनेर दबाउन खोज्नेहरुले इनरुवामा हुने राजाको जनअभिनन्दनका ब्यानर हटाउने आदेश दिएछन् ! फेरि भन्छौँ– कसैलाई निषेध नगर, शासकीय अहंकार बन्द गर ।”
