काठमाडौँ । निर्वाचन आयोग, नेपालले आज राष्ट्रपति निर्वाचनका लागि मतदाता नामावली सार्वजनिक गर्दैछ ।
आयोगले फागुन २५ गते हुने राष्ट्रपति निर्वाचनको लागि मतदाता नामावली सार्वजनिक गर्न लागेको हो ।
नामावली प्रकाशनपछि दाबी–विरोध गर्ने तथा नाम सच्याउन दुई दिनको समय दिइनेछ । राष्ट्रपतिको निर्वाचनमा प्रतिनिधि सभाका सदस्य, राष्ट्रिय सभाका सदस्य र प्रदेश सभा सदस्यहरुले मत दिन पाउने व्यवस्था छ ।
राष्ट्रपतिमा निर्वाचित हुनको लागि सङ्घीय र प्रदेशसभातर्फका तत्काल कायम रहेका कुल सदस्य सङ्ख्याको बहुमत अर्थात् ५० प्रतिशत मत प्राप्त गर्नुपर्ने हुन्छ । राष्ट्रपतिको उम्मेदवार ४५ वर्ष उमेर पूरा भएको नेपाली नागरिक हुनुपर्छ। यद्यपी, संघीय संसद् र प्रदेश सभाका सदस्य नै राष्ट्रपति हुनुपर्छ भन्ने व्यवस्था छैन ।
