काठमाडौँ । लोकतान्त्रिक समाजवादी पार्टी, नेपालको केन्द्रिय कार्यकारिणी समितिको बैठक सुरु भएको छ ।
पुस २६ गते सरकारलाई विश्वासको मत दिनुपर्ने परिस्थितिका माझ सो पार्टीको केन्द्रिय कार्यकारिणी समितिको बैठक सुरु भएको हो ।
काठमाडौंको बबरमहलसिथत पार्टी केन्द्रिय कार्यालयमा आईतबार बसेको बैठकमा मुलुकको समसामयिक राजनीतिक परिस्थितिका विषयमा केन्द्रित भएर छलफल हुने नेता जितेन्द्र सोनलले जानकारी दिनु भयो ।
त्यसैगरी बैठकमा पार्टीको संगठन सुदृढिकरण र विस्तारको कामलाई पनि अघि बढाउने विषयमा छलफल हुने एजेण्डा तय गरिएको छ । नेता सोनलले भन्नु भयो, ‘हामी हाम्रो संगठन केन्द्रदेखि प्रदेश, जिल्ला र स्थानीय तह समेतमा कसरी विस्तार र सुदृढ गर्ने त्यस सम्बन्धमा यो बैठक केन्द्रित हुन्छ । र, समसामयिक राजनीतिकको सन्दर्भमा पनि बैठकमा छलफल हुन्छ । नेपाली काँग्रेस लगायतका जुन पाँच दलीय गठबन्धन थियो ।’
‘त्यही गठबन्धनमा हामी चुनाव लड्यौं । अव अर्को गठबन्धनमा सरकार बनेको छ । हामीले के गर्ने, कुन दिशा लिने ? नेपाली काँग्रेससँग हाम्रो सम्बन्ध के रहने, वर्तमान सरकारसँग हाम्रो सम्बन्ध कसरी रहने लगायतका जो विषय छ । हामीले उठान गरेको माग, मुद्दाको सन्दर्भमा छ । नागरिकता विधेयकको विषय छ । यी सबै समसामयिक राजनीतिक मुद्दा भित्र पर्दछ । ती सबै विषयमा हामी छलफल गर्छौं ।’
नयाँ सरकारमा पार्टीको सहभागित हुने, नहुनेबारे, नागरिकता विधेयकलाई अघि बढाउने बारे र जेलमा रहेका पार्टीका नेता, कार्यकर्तालाई रिहाई गर्न सरकारलाई दवाव दिने विषयमा पनि छलफल हुने जसपाले जनाएको छ ।
