काठमाडौँ । नेकपा (एकीकृत समाजवादी) ले पार्टी पुनर्गठनको महाअभियान सुरु गर्ने भएको छ । शनिबारदेखि सुरु भएको पार्टी स्थायी कमिटीको बैठकपछि पार्टी उपमहासचिव गंगालाल तुलाधरले पार्टी एकताको विषयमा नेकपा (एमाले) का केही नेताहरूले मात्रै हल्ला चलाएको बताउनुभयो ।
उहाँले एकताका लागि नेकपा (माओवादी केन्द्र) र जनता समाजवादी पार्टी (जसपा) का नेताहरूसँग कुरा भइरहेको जानकारी दिनुभयो ।
उहाँले गठबन्धन, सरकार र पार्टी एकताको विषयमा छलफल भइरहे पनि पार्टी पुनर्गठन महाअभियान थाल्ने तयारी गरेको बताउनुभयो ।
उहाँले स्थायी कमिटीको बैठकमा अधिकांश नेताहरुको धारणा पुष्पकमल दाहाल प्रचण्ड नेतृत्वको सरकारलाई समर्थन गर्नुपर्ने आएको भए पनि प्रधानमन्त्रीबाट औपचारिक रूपमा प्रस्ताव नआएसम्म सरकारमा जान नहुने निष्कर्ष आएको बताउनुभयो ।
एकीकृत समाजवादीले समर्थन नदिएपनि सरकार चल्ने तर सरकारमा जान हतार गर्न हुँदैन, समर्थन गर्ने कुरा फरक हो भन्ने कुरा बैठकमा उठेको उहाँले जानकारी दिनुभयो ।
