काठमाडौं । नवनियुक्त प्रधानमन्त्री पुष्पकमल दाहाल प्रचण्डले आज अपरान्ह पद तथा गोपनियताको सपथ लिँदै हुनुहुन्छ । अपराह्न ४ बजे राष्ट्रपति विद्यादेवी भण्डारीले उहाँलाई सपथ ग्रहण गराउनुहुनेछ ।
त्यसो त सपथ ग्रहण अघि गठबन्धनमा मन्त्री भागबन्डा मिलाउन बैठक जारी छ। संघीय संसद भवनमा मन्त्रालयबारे सहमति जुटाउन अहिले नेताहरु छलफलमा छन् ।
७ दलको गठबन्धन सरकारको नेतृत्व गरिरहेका प्रचण्डको सरकारमा तीनजना उपप्रधानमन्त्री हुने लगभग पक्का भएको छ ।
माओवादी केन्द्रका वरिष्ठ उपाध्यक्ष नारायणकाजी श्रेष्ठ र नेकपा एमालेका उपाध्यक्ष विष्णु पौडेल उपप्रधानमन्त्रीसहित प्रमुख मन्त्रालय सम्हाल्दै सपथ लिने तयारीमा हुनुहुन्छ ।
यस्तै, सत्ता गठबन्धनको तेस्रो ठूलो दल राष्ट्रिय स्वतन्त्र पार्टी (रास्वपा)ले पनि उपप्रधानमन्त्रीमा दाबी गरेको छ । पार्टी सभापति रवि लामिछाने उपप्रधानमन्त्री बन्ने पनि लगभग निश्चित भएको स्रोत बताउँछ । लामिछानेले उपप्रधानमन्त्रीसहित गृह र भौतिक पूर्वाधार मन्त्रालयमा दाबी गरेपनि त्यसमा सहमति जुट्न सकेको छैन ।
