काठमाडौं । संयुक्त राज्य अमेरिकाले नेपालको संघीय निर्वाचनमार्फत प्रधानमन्त्री बन्नुभएकामा पुष्पकमल दाहाल प्रचण्ड र उहाँको गठबन्धन सरकारलाई बधाई दिएको छ ।
नेपालस्थित अमेरिकी राजदूतावासले आज एक विज्ञप्ति जारी गर्दै भनेको छ, “हामी नेपालसँग सुदृढ र लामो समयदेखिको सम्बन्ध भएकोमा गर्व गर्छौं ।”
साथै अमेरिकाले आर्थिक वृद्धि हासिल गर्न, लोकतन्त्र र मानव अधिकारको सुदृढीकरण जस्ता द्विपक्षीय, क्षेत्रीय र विश्वव्यापी महत्त्वका विषयहरूलाई प्रवर्द्धन गर्न नेपाल सरकारसँगै उभिन जारी राख्ने बताएको छ ।
नेपालको लोकतन्त्रप्रतिको प्रतिबद्धता विश्वभरका देशहरूका लागि उदाहरण हो भन्दै उसले यसमा संलग्न सबैलाई प्रशंसा गरेको उल्लेख गरेको छ ।
नेपालले आफ्नो लोकतान्त्रिक परम्परालाई अझ गहिरो बनाउन जारी राख्ने विश्वास गर्दै दूतावासले यसमा सहयोग गर्न अमेरिका तत्पर रहेको उल्लेख गरेको छ ।
