काठमाडौँ । दक्षिण अमेरिकी राष्ट्र अर्जेन्टिनाले ३६ वर्षपछि फिफा विश्वकप फुटबल प्रतियोगिताको उपाधि जित्न सफल रह्यो ।
कतारको दोहास्थित लुसेल रङ्गशालामा गएराति भएको २२औँ संस्करणको फाइनल खेलमा फ्रान्सलाई टाइब्रेकरमा ४–२ गोलअन्तरले हराउदै अर्जेन्टिनाले विश्वकपको उपाधिमा ह्याट्रिक गरेको हो ।
यसअघि अर्जेन्टिनाले सन् १९७८ र १९८६ गरी दुई पटक उपाधि जितिसकेको छ ।
अर्जेन्टिनालाई उपाधि दिलाउन महत्वपूर्ण योगदान दिलाएका लियोनल मेसीले प्रतियोगितामा ७ गोल र ३ असिस्ट प्रदान गर्दै गोल्डेन बल प्राप्त गरे ।
प्रतियोगितामा सबैभन्दा धेरै आठ गोल गरेका फ्रान्सका केलियन एम्बाप्पेले गोल्डेन बुट पाए । उनले प्रतियोगिताका सात खेलमा आठ गोल गरेका थिए ।
उनले मेसीलाई पछि पार्दै गोल्डेन बुट पाएका हुन् । मेसीले सात खेलमा सात गोल गरेका थिए ।
साथै अर्जेन्टिनाका गोलरक्षक इमिलियानो मार्टिनेज उत्कृष्ट गोलरक्षक भए भने ‘योङगेष्ट प्लेयर’ एन्जो फर्नान्डेज भए ।
