काठमाडौँ । नेकपा (माओवादी केन्द्र)ले आज पनि पदाधिकारी टुंगो लगाउन सकेन । शुक्रबार बिहान पार्टी मुख्यालय पेरिसडाँडामा बसेको स्थायी कमिटी बैठकले पदाधिकारीले टुंग्याउन नसकेको हो ।
माओवादी महासचिवमा ७ नेताले आफ्नो दाबी पेश गरेका छन् । बैठकमा देव गुरुङ, वर्षमान पुन, जनार्दन शर्मा, गिरिराजमणि पोखरेल, हरिबोल गजुरेल, शक्ति बस्नेत र पम्फा भुसालले महासचिवमा आफ्नो पनि दाबी रहेको बताएका हुन् ।
पार्टीका प्रवक्ता कृष्णबहादुर महराले बैठकमा पदाधिकारीबारे छलफल भए पनि टुंगो नलागेको बताए । महराले भने, ‘पदाधिकारीको विषयमा र कार्यक्रमको विषयमा विस्तृत छलफल गरेका छौँ । भोलि १ बजे बसेर टुंग्याउने भनिएको छ । पदाधिकारीका विषयमा पनि करिव करिव टुंगिएको स्थिति छ । अध्यक्ष र अरु कमरेडको अन्य कार्यक्रममा भाग लिनुपर्ने भएकोले भोलि सम्मका लागि सरेको हो ।’
