काठमाडौँ । नेकपा (एमाले)का सांसद प्रदीप ज्ञवालीले टाउको गणना नगरी विधिको गणनाका आधारमा नागरिकता ऐन संशोधन विधेयकलाई टुंगोमा पुर्याउनुपर्ने बताउनुभएको छ ।
प्रतिनिधिसभाको आजको बैठकमा सदनमा प्रस्तुत नागरिकता ऐन संशोधन विधेयकमाथिको छलफलमा उहाँले राजा वीरेन्द्रले पनि २०३७ सालमा जनमत संग्रह गर्दा टाउकाका आधार छिनोफानो भए पनि पछि पञ्चायती व्यवस्था टिक्न नसकेको टिप्पणी गर्नुभयो ।
नागरिकताजस्तो संवेदनशील विधेयकलाई राष्ट्रपतिले पुनरविचार गर्न सन्देशसहित फिर्ता पठाएको भन्दै उहाँले भन्नुभयो, “फिर्ता पठाइएको विधेयकलाई जस्ताको तस्तै पारित गर्न सत्ता गठबन्धनको बैठक बसेको भन्ने सुनेको छु, सदनमा विचाराधीन विषयलाई बन्द कोठामा बसेर संसद्को अधिकारलाई संकुचन गर्न खोजियो ।”
राष्ट्रपतिले विशेषगरी आमाको आत्मसम्मानको विषयमा प्रश्न उठाउनुभएको छ भन्दै सांसद ज्ञवालीले सन्देशसहित फिर्ता पठाएको विधेयकमाथि संशोधन गर्न राख्न पाउने अधिकारलाई सुनिश्चित गरिनुपर्ने उल्लेख गर्नुभयो । प्रतिनिधिसभामा रहनुभएका महिला सांसदहरुले पनि यो विषयलाई गम्भीरतापूर्व हेरिनुपर्ने उहाँको भनाइ थियो ।
नागरिकता विधेयक भनेको राष्ट्रिय एकता हासिल गर्ने विधेयक पनि हो भन्दै उहाँले भन्नुभयो, “सिंगो देशको साझा सवाल भएको नागरिकता विधेयकलाई समुदायको मात्रै समस्या बनाउने, राजनीतिकरण गर्ने र राष्ट्रिय एकतालाई नै खलल पुर्याउने बहस आपत्तिजनक छ ।”
नागरिकता विधेयकलाई छिटोभन्दा छिटो टुंगो लगाउन सहयोग गर्न प्रमुख प्रतिपक्षी दल नेकपा एमाले तयार छ भन्दै आमाको गरिमासँग जोडिएको विधेयकलाई सर्वस्वीकार्य दस्तावेज बनाउन आग्रह गर्नुभयो ।
