काठमाडौं । नेकपा एमालेका प्रमुख सचेतक विशाल भट्टराईले राष्ट्रपति विद्यादेवी भण्डारीले प्रधानमन्त्री शेरबहादुर देउवासँग परामर्श गरेर नागरिकता विधेयक फिर्ता पठाएको दाबी गरेका छन् ।
प्रतिनिधिसभाको आजको बैठकमा बोल्दै उनले भने ,राष्ट्रपतिले नागरिकता विधेयकमा फेरि छलफल गर्ने मौका दिनुभएको छ ।यसलाई एमालेसँग जोडेर होइन, सिङ्गो मुलुकको भावना बुझेर कानूनविदसँग परामर्श गरेर र मैले सुनेअनुसार स्वयम् प्रधानमन्त्रीसँग पनि परामर्श गरेर संसदमा पठाउनुभएको छ । समितिमा २२ महिना छलफल भएको विधेयक अकस्मात फिर्ता लिएर ७ वर्षे प्रावधान हटाइने संसारमा कहिँ पनि यस्तो व्यवस्था छैन । ’
नागरिकता विधेयक फिर्ता भएसँगै राष्ट्रपतिलाई एमालेसँग जोडेर विवादमा ल्याउन खोजिएको भन्दै भट्टराईले आपत्ति जनाएका छन् । नागरिकतासम्बन्धी अध्यादेश र विधेयक एउटै नभएकाले यस विषयमा राष्ट्रपतिजस्तो गरिमामय पदलाई विवादित बनाउन नहुनेमा उनको जोड थियो ।
साथै सांसद भट्टराईले समाजलाई विभाजित गरेर होइन, सबैलाई समेटेर अगाडि बढ्न आग्रह गरेका छन् ।
