निर्वतमान संस्कृति, पर्यटन तथा नागरिक उड्डयनमन्त्री प्रेमबहादुर आलेका पहलमा राष्ट्रिय गौरवको आयोजना अन्तरगत पर्ने डोटीको भेलछडा–सिलगढी खानेपानी निर्माणको बाटो खुलेको छ ।
उक्त आयोजना निर्माणका लागि खप्तड राष्ट्रिय निकुञ्जको कार्यालयले निकुञ्जमा समस्या हुँने भन्दै खानेपानी निर्माण कार्यमा असहमती जानाएपछि निर्माण कार्य अगाडि बढ्न सकेको थिएन । तर निर्वतमानमन्त्री आलेले वन तथा वातावरणमन्त्री प्रदीप यादवलाई उक्त खानेपानीका विषयमा निकुञ्जले गरेको असहमती अन्त गर्नका लागि आग्रह गर्नु भएपछि वन तथा वातावरण मन्त्रालयले आजै मन्त्रिस्तरिय निर्णय गरी खानेपानीका विषयमा निकुञ्जले गरेको असहमती अन्त भएको हो ।
कम्तिमा पनि रु ३० करोडको लागतमा बन्ने उक्त आयोजना १७ किलो मिटर लम्बाई रहेको र यहाँ एक हजार २०० धारा निर्माण हुने भएका छन् । उक्त आयोजना सुरु भएपछि यहाँका गैरागाउँ, सिलगढी, पाकरी, कलेना, धामीगाउँ, पुन्ना, लेकठाटा, बागठाँटा, नाचनथली लगायतका क्षेत्रका नागरिकहरु प्रतक्ष लाभान्वित हुने भएको स्थानीयवासी रामबहादुर धामीले बताउनुभयो ।
वन तथा वातावरणमन्त्री यादवले स्थानीय उपभोक्तालाई सहजरुपमा खानेपानी उपलब्ध गराउन, खानेपानीको व्यवसायिक प्रयोजन नगर्ने शर्तमा हाल स्वीकृत भएको डिपिआर संरचनामा थप गर्न नपाउने गरी विभागले तोकिदिएको उपयुक्त विधि अनुसार आयोजना सञ्चालन तथा मर्मत गर्ने मन्त्रिस्तरीय निर्णय गर्नु भएको छ ।
यसैगरी मन्त्री यादवले खप्तड राष्ट्रिय निकुञ्जको नियमावली, २०४४ को नियम ३४ बामेजिम उक्त खानेपानी आयोजनाको सहमती उपलब्ध गराउन समेत निर्णय गर्नु भएको छ । राष्ट्रिय निकुञ्जको असमतीका कारण वर्षौदेखि उक्त खानेपानी आयोजना निर्माण हुन सकेको थिएन । मन्त्री यादवले खानेपानी निर्माणका लागि अवरोध फुकुवा गरेसँगै अहिले डोटीका नागरिकहरु निकै खुशी भएका स्थानीयवासीहरु बताउछन् ।
