काठमाडौँ । नेपाल राष्ट्र बैंकले शुक्रबार सार्वजनिक गरेको चालु आर्थिक वर्षको मौद्रिक नीतिको तेस्रो त्रैमासिक समीक्षामा कुनै नीतिगत परिवर्तन गरेको छैन ।

केन्द्रीय बैंकले अर्धवार्षिक समीक्षामा व्यवस्था गरिएका अधिकांश नीतिहरुलाई नै तेस्रौ त्रैमासिक समीक्षामा पनि निरन्तरता दिएको छ । यद्यपि मुद्रास्फीति र विदेशी विनिमय सञ्चितिको आयात धान्ने क्षमतामा दबाव पर्दै गएको अवस्थामा भने मौद्रिक नीतिको कार्यदिशालाई थप कसिलो बनाउने राष्ट्र बैंकले जनाएको छ ।

मौद्रिक नीतिको समीक्षामा कोभिड संक्रमणका कारण प्रभावित उद्योग व्यवसायको पुनरुत्थानका लागि राष्ट्र बैंकले प्रदान गर्दै आएको पुनरकर्जा सुविधालाई पुनरुत्थान हुन बाँकी रहेका अति प्रभावित क्षेत्रमा सीमित गर्दै लैजाने विद्यमान नीतिलाई निरन्तरता दिइएको छ ।

आन्तरिक तथा बाह्य क्षेत्रमा विद्यमान दबाब कम गरी समष्टिगत आर्थिक स्थायित्व कायम गर्न ब्याजदरका साथै अन्य छनौटपूर्ण उपकरणहरु प्रयोग गरिने समीक्षामा उल्लेख छ ।

केन्द्रीय बैंकले मूल्य तथा बाह्य क्षेत्र स्थायित्वलाई मध्यनजर गरी उत्पादनशील क्षेत्र, लघु, साना तथा मझौला व्यवसाय, आन्तरिक उत्पादन अभिवृद्धि तथा निर्यात प्रवद्र्धन लगायतका क्षेत्रमा वित्तीय साधनको प्रवाह बढाउन जोड दिएको छ ।

[pdf-embedder url=”https://newspolar.com/wp-content/uploads/2022/05/Monetary-Policy-2078-79-3rd-Quarter-Review-1.pdf” title=”Monetary-Policy-2078-79-3rd-Quarter-Review (1)”]