भरतपुर । भरतपुर महानगरपालिकाको एक मतदान केन्द्रमा नेपाली कांग्रेसका कार्यकर्ताले पत्रकारमाथि दुव्र्यवहार गरेका छन् । भरतपुर–७ स्थित कृष्णपुर माविको मतदानस्थलमा सो महानगरका मेयरका स्वतन्त्र उम्मेदवार जगन्नाथ पौडेलले गर्न लागेको मतदानको फोटो र भिडियो खिच्ने क्रममा कांग्रेस कार्यकर्ताले पत्रकारमाथि दुव्र्यवहार गरेका हुन् ।
नेपाली कांग्रेस भरतपुर–७ का सभापति विनोद ढकालको समूहले पत्रकारमाथि दुव्र्यवहार गर्दै भिडियो खिच्न अवरोध गरेको थियो । समूहले क्यामेरा फुटाउनेसम्मको धम्की दिएको थियो ।
वडा नं ७ का कांग्रेस सभापति ढकाल कांग्रेस सभापति शेरबहादुर देउवा पक्षका भएको बताइएको छ । कांग्रेसबाट बागी उम्मेदवारी दिएका पौडेलले पनि सोही मतदान केन्द्रबाट मतदान गर्ने भएपछि त्यसको भिडियो र फोटो खिच्न पुगेका पत्रकारलाई ढकाल समूहले दुव्र्यवहार गरेको हो ।
सपाङ्ग बुबा आमाका तर्फबाट छोराले गरिदिए मतदान
भरतपुर महानगरपालिकाको सोही विद्यालयको ‘ग’ मतदान केन्द्रमा छोराले बुबा आमाको तर्फबाट मतदान गरेका छन् । भरतपुर–७ का वडासदस्य राजेन्द्र तामाङले आफ्नो बुबा आमा आफैँ हिँड्न र देख्न सक्ने भए पनि त्यस्तो गर्न नसक्ने भन्दै मतदान गरेका हुन् ।
बुबा आमासँगै मतदान केन्द्रमा पुगेका तामाङलाई सुरुमा दर्ता कार्यमा खटिएका कर्मचारीले अरुले मतदान गर्न नमिल्ने बताएका थिए । आफू जनप्रतिनिधि भएको र बुबाआमा हिँड्न र देख्न नसक्ने भन्दै आमासँगै मतपत्र लिएर बुथमा पुगेका थिए ।
उनले बुथमा मतपत्र भरे पनि मतपत्र भने आमा आफैँले मतपेटिकामा हालेकी थिइन् । मतपत्र भरेर निस्किँदै गर्दा मतदान अधिकृतले चिट फेला पारेर जफत गरेकी थिइन् । तामाङले पुनः आफ्नो बुबाको मतपत्र भरिदिए ।
चिट जफत गरेको भिडियो मिडियामा नल्याउन दबाव दिँदै मतदान अधिकृतले चिट चोर्न नमिल्ने भएरै आफूले जफत गरेको बताइन् ।
पाँच दलीय सत्ता गठबन्धनले चिट चोर्न सजिलो हुनेगरी आफ्नो दलको चुनाव चिह्न मात्रै राखेर सानो नमूना मतपत्र बनाएको थियो । सुरक्षाकर्मीले केही मतदाताको गोजीमा नमूना मतपत्रको चिट फेला परेपछि गेटमै च्यातेर फ्यालिदिएका थिए । यद्यपि केहीले भने भने लुकाएर लगेर चिट चोरेर मतदान गरेको बताइएको छ ।
मुख्य निर्वाचन अधिकृतको कार्यालय भरतपुरका सूचना अधिकारी पुरुषोत्तम पौडेलले आँखा देख्न सक्ने र आफैँ हिँड्न सक्ने मतदाताले सहयोगी राख्न नपाउने भन्दै चिट चोरेर मतदान गरेको विषयमा सम्बन्धित मतदान केन्द्रमा बुझ्ने बताए ।
