काठमाडौं । सरकारले १ वर्षअघि सञ्चालनका लागि भारतबाट खरिद गरेको रेलको ‘वारेन्टी’ सकिँदा समेत सञ्चालनमा आउन सकेको छैन ।
नेपाल रेल्वे कम्पनी लिमिटेडले भारतसँग खरिद गरेको २ सेट रेलको वारेन्टी सञ्चालनमा आउनुअगावै सकिएको छ । १ वर्षको वारेन्टी भएको रेल १ वर्षअघि भारतको कोंकण रेल्वे कार्पोरेसनसँग सरकारले ८४ करोड ६५ लाखमा खरिद गरेको थियो ।
नेपाल रेल्वे कम्पनीद्वारा खरिद गरेर २ सेट रेल २०७७ असोज २ गते नेपाल ल्याइएको थियो । जनकपुर ल्याई नेपाल रेल्वे कम्पनीलाई रेल सेट हस्तान्तरण गरिए पनि अहिलेसम्म सञ्चालन आउन सकेको छैन ।
ब्म्ख्भ्च्त्क्ष्क्भ्ःभ्ल्त्
खरिद गरेको १ वर्ष पूरा भएपछि सो रेलको इन्जिन र बोगीको ‘वारेन्टी’ असोज ३ गते नै सकिएको छ । रेललाई खुला आकाशमा पालले ढाकेर सशस्त्र प्रहरीको पहरा दिएर राखिएको छ । लामो समयसम्म राखिँदा रेललाई ढाकिएको पाल समेत च्यातिन थालेका छन् ।
अघिल्लै सरकारको पालादेखि सरकारी पक्षबाट रेल सञ्चालनको लागि पटक–पटक समय तोके पनि सञ्चालनको मिति जुर्न सकेको छैन । रेल सञ्चालनका लागि कानूनदेखि जनशक्ति लगायतका समस्या रहँदै आएको छ ।
यसअघि सरकारले रेल सञ्चालनका लागि अध्यादेश जारी गरे पनि अहिले रेल सञ्चालनको विषय कानूनविहीन अवस्था रहेको छ ।
एमाले अध्यक्ष केपी शर्मा ओली नेतृत्वको सरकारले ३५ करोड रुपैयाँ वार्षिक तिर्ने गरी भारतीय कोंकण रेल्वेलाई सञ्चालनको जिम्मा दिएको थियो । सम्झौताअनुसार सरकारले रेल चलाइदिने कम्पनीलाई दैनिक करीब १० लाख रुपैयाँ बुझाउनुपर्नेछ । यस हिसाबले रेल सञ्चालनका लागि मात्रै वार्षिक १० करोडभन्दा बढी घाटा राज्यले व्यहार्नुपर्ने भएको छ ।
रेल सञ्चालनको जिम्मा पाएको कोंकण रेल्वेले ८ करोड भारतीय रुपैयाँ भुक्तानी मागिरहेको छ । आफूले पाउनुपर्ने अग्रिम २० प्रतिशत भुक्तानी नदिए ठेक्का सम्झौता रद्द गर्ने चेतावनी कम्पनीले दिएको छ ।
निवर्तमान भौतिक पूर्वाधार तथा यातायातमन्त्री वसन्तकुमार नेम्वाङले जेठ १९ गते नै रेल सञ्चालनका लागि सबै तयारी पूरा भएकाले निषेधाज्ञा खुलेपछि जयनगर–जनकपुर खण्डमा रेल सञ्चालन हुने बताएका थिए तर अहिले सरकारी पक्षबाट रेल सञ्चालनका लागि अझै आवश्यक सबै तयारी पूरा नभएको पाइएको छ ।
सन् २०१४ देखि बन्द रहेको नेपालको एक मात्र रेलमार्ग पुनः सञ्चालन गर्ने व्यवस्थासहित सरकारले रेल खरिद गरे पनि कहिलेदेखि सञ्चालनमा आउने भन्ने अझै अनिश्चित छ । ३४ किलोमिटरको जनकपुर–जयनगर रेलमार्ग ब्रोड गेजमा विस्तार भएको र यो मार्गमा २०७५ पुसमै रेल सञ्चालन गर्ने घोषणा सरकारले गरेको समाचार राजधानी दैनिकमा प्रकाशित छ ।
