काठमाडौं । विद्यालय तहको नयाँ पाठ्यक्रम आगामी शैक्षिक सत्रमा १०० विद्यालयमा परीक्षणका रूपमा लागू गरिने भएको छ। कान्तिपुर दैनिकमा प्रकाशित समाचारअनुसार पाठ्यक्रम विकास केन्द्रका कार्यधारी निर्देशक लेखनाथ पौडेलले कक्षा १ र ११ को नयाँ पाठ्यक्रम शैक्षिक सत्र २०७७ देखि मात्र लागू गर्ने तयारी गरिएको जानकारी दिए।
केन्द्रले यसअघि आगामी शैक्षिक सत्रदेखि नयाँ पाठ्यक्रमको आधारमा पठनपाठन गराउने जनाएको थियो। केन्द्रका कार्यत्रारी निर्देशक पौडेलका अनुसार आगामी शैक्षिक सत्रमा सातवटै प्रदेशबाट विद्यालय छनोट गरेर पाठ्यक्रम परीक्षण गरिनेछ। ‘परीक्षणपछि मात्र देशभरका विद्यालयमा नयाँ पाठ्यक्रमका आधारमा पठनपाठन सुरु हुन्छ’, उनले भने।
राष्ट्रिय पाठ्यक्रम विकास तथा मूल्यांकन परिषद्ले विद्यालय तह कक्षा १ देखि १२ को राष्ट्रिय पाठ्यक्रम प्रारूप पारित गरिसकेको छ। त्यहीअनुसार चालू शैक्षिक सत्रमा नमुना परीक्षण गरेर २०७६ देखि लागू गर्ने तयारी छ।
