काठमाडौं । राष्ट्रिय जनता पार्टी नेपाल (राजपा नेपाल) ले संघीय लोकतान्त्रिक गणतन्त्रात्मक संविधान विपरित र लोकतन्त्रको मूल्य मान्यता विपरितका विधेयक फिर्ता लिन सरकारको ध्यानाकर्षण गराएको छ ।
राजपा नेपालको केन्द्रीय कार्यालय बबरमहलमा शुक्रबार बसेको पार्टी अध्यक्ष मण्डलको बैठकले विभिन्न तीन विधेयक फिर्ता लिन ध्यानाकर्षण गराएको हो ।
राजपा नेपाल अध्यक्ष मण्डलका संयोजक शरतसिंह भण्डारीले तीन वटै विधेयक अविलम्ब फिर्ता नलिए त्यसबाट उत्पन्न हुने भयावह परिस्थितिको जिम्मेवारी स्वयं सरकारले लिनुपर्ने बताए ।
सरकारले मानवअधिकार माथि अंकुश लगाउने गरी ल्याएको राष्ट्रिय मानवअधिकार आयोग ऐन २०६८ लाई संशोधन गर्न बनेको विधेयक, प्रेस स्वतन्त्रतालाई हन्न हुने गरी नियन्त्रण गर्न ल्याएको मिडिया काउन्सिल सम्बन्धी कानूनलाई संशोधन र एकीकरण गर्न बनेको विधेयक तथा प्रधानमन्त्रीले चाहेमा सेना परिचालन गर्न सक्ने गरी राष्ट्रिय सुरक्षा परिषदको काम, कर्तव्य र अधिकार सम्बन्धमा व्यवस्था गर्न बनेको विधेयक संघीय लोकतान्त्रीक गणतन्त्रात्मक संविधान तथा लोकतन्त्र विपरित रहेको ठहर राजपा नेपालको छ । यो खबर आजको राजधानी दैनिकले छापेको छ ।
