गोरखा । मंगलबार राति गोरखा नगरपालिका–९ ठिगुरेस्वाँराका सदरमुकाम नजिकैको तीन घरमा चोरी भएको छ । एक तोलाको छड्के तिलहरी र नगद ५० हजार रुपैयाँ चोरी भएको स्थानीय सानुमाया कुवँरले बताइन् । विहान घरकसेर गर्न उठ्दा मूल ढोकाको चापी खुल्लै देखेँ,’ उनले भनिन्, ‘कोठाभित्र रहेको दराजको ढोका फुटाएर सबै लुगा बाहिर झरेको रहेछ ।’
अर्कै कोठामा सुतेकी उनले विहानपख मात्र दराजमा भएको नगद र गहना चोरी भएको थाहा पाइन् । घाँटीमा लगाएको सुनको सिक्री चोरी भएको भन्दै बन्दना दानी क्षेत्रीले पनि प्रहरीमा उजुरी दिएकी छिन् । ‘बिहान करिव चार बजेतिर म निन्द्राबाट ब्युँझिसकेको थिए, एक्कासी कोठाको ढोका खुलेको आवाज सुनेर ढोका नजिक मात्र के पुगेको थियो एक्कासी मेरो घाँटी समायो ’, उनले भनिन् ।
कालो पोशाकमा मास्क लगाएर आएको उक्त व्यक्तिले घाँटीको सिक्री तान्ने प्रयास गर्दा केहीबेर धकेलाधकेल समेत भएको क्षेत्रीले बताइन् । कमलकुमारी श्रेष्ठको पनि साढे दुई तोलाको सिक्री चोरी भएको भन्दै प्रहरीमा उजुरी परेको छ । सुतिरहेको कोठामा पसेर नाक र मुख थुनी घाँटीको सिक्री चोरेर लगेको पीडितले बताएका छन् ।
सुतिरहेको कोठामा पसेर नाक र मुख थुनी घाँटीको सिक्री चोरेर लगेको पीडितले बताएका छन् प्रहरीले घटनाबारे थप अनुसन्धान भइरहेको बताएको छ ।
