काठमाडौँ । प्रमुख प्रतिपक्ष दल काँग्रेसले सत्तारुढ दल नेकपाको राजनीतिक प्रतिवेदनमा काँग्रेसबारे इमान्दार दृष्टि नराखि दृष्टिदोष प्रस्तुत गरेको बताएको छ ।
बिहीबार पार्टी कार्यालय सानेपामा आयोजित पत्रकार सम्मेलनमा प्रवक्ता विश्वप्रकाश शर्माले दृष्टि उपर दृष्टिकोण व्यक्त गर्न मिल्ने तर दृष्टिदोषमाथि केवल दया मात्र गर्न सकिने भन्दै विनम्र ढंगले दया व्यक्त गर्ने बताए ।
उनले भने, ‘अहिलेलाई केवल यति टिप्पणी त्यो दस्तावेजमा कांग्रेसबारे इमान्दार दृष्टि होइन बरु दृष्टिदोष प्रस्तुत छ ।’ दृष्टि उपर दृष्टिकोण व्यक्त गर्न मिल्ने भन्दै उनले भने, ‘दृष्टिदोषमाथि केवल दया मात्र । म विनम्र ढंगले दया व्यक्त गर्न चाहन्छु ।’
कांग्रेसले स्थापनाकालदेखि नै लोकतन्त्र, संसदीय प्रणाली, समावेशीता, स्वतन्त्र प्रेस, निष्पक्ष न्यायालय, निजी सम्पत्ति र व्यक्तिगत स्वतन्त्रता आदिको स्थापना र सम्वद्र्धनका लागि नेतृत्वदायी भूमिका खेल्दै आएको प्रवक्ता शर्माले बताए ।
पत्रकार सम्मेलनमा प्रवक्ता शर्माले निजामति कर्मचारीहरुको ट्रेड युनियन, गोगंबु बसपार्क प्रकरण, नेकपाको पार्टी कार्यालय लगायतका विषयमा काँग्रेसको धारण सार्वजनिक गरेका थिए ।
