काठमाडौं । त्रिशूली–३ ‘बी’ जलविद्युत् आयोजनास्थलमा उद्धार कार्यलाई थप प्रभावकारी बनाउन नेपाली सेनासहितको प्राविधिक टोली परिचालन गरिएको छ।
आयोजनाका प्रमुख, परामर्शदाता कम्पनीका प्रमुख तथा साइट इन्जिनियरसहित नेपाली सेनाको टोली घटनास्थलमा पुगेर उद्धार कार्य सुरु गरेको हो।
टोलीले आयोजनास्थलको भौगोलिक तथा प्राविधिक अवस्थाबारे स्थलगत निरीक्षण गरी सम्भावित जोखिमको मूल्यांकन गरिरहेको छ। जोखिमलाई ध्यानमा राख्दै उद्धार कार्यलाई सुरक्षित र व्यवस्थित रूपमा अघि बढाइएको जनाइएको छ।
उद्धारमा संलग्न विभिन्न निकायबीच आवश्यक समन्वयसमेत भइरहेको छ। प्रतिकूल मौसम र चुनौतीपूर्ण भौगोलिक अवस्थाका कारण उद्धार कार्य जटिल बने पनि आवश्यक जनशक्ति, उपकरण तथा स्रोतसाधन परिचालन गरिएको आयोजनाले जनाएको छ।
सम्भावित जोखिम न्यूनीकरण गर्दै उद्धार कार्यलाई निरन्तरता दिइएको छ।
