काठमाडौं । विनाशकारी बाढी तथा पहिरोबाट प्रभावित नेपाललाई संयुक्त अरब इमिरेट्स (यूएई) ले ठूलो मानवीय सहयोग घोषणा गरेको छ।
यूएईले नेपाललाई १ करोड अमेरिकी डलर (करिब १३५ करोड रुपैयाँ) मानवीय सहयोग उपलब्ध गराउने घोषणा गरेको हो। यो हालसम्म नेपालले प्राप्त गर्ने सबैभन्दा ठूलो एकमुष्ट अन्तर्राष्ट्रिय सहयोगमध्ये एक भएको जनाइएको छ।
यसैगरी, यूएईले बाढी तथा पहिरो प्रभावितका लागि ८० टन राहत सामग्री नेपाल पठाइसकेको छ। थप मानवीय सहायता समेत उपलब्ध गराउने प्रक्रिया अघि बढिरहेको जनाइएको छ।
विपद्को कठिन घडीमा यूएईले नेपालप्रति देखाएको सहयोग र ऐक्यबद्धताको नेपालमा प्रशंसा गरिएको छ। सहयोगले बाढी तथा पहिरोबाट प्रभावित नागरिकको उद्धार, राहत तथा पुनःस्थापनामा महत्वपूर्ण योगदान पुग्ने अपेक्षा गरिएको छ।
नेपाल र यूएईबीचको मैत्रीपूर्ण सम्बन्धलाई यस्तो मानवीय सहयोगले थप मजबुत बनाउने विश्वास व्यक्त गरिएको छ।
