काठमाडौं । सुनसरीको देवानगञ्जमा भएको घटनामा ज्यान गुमाएका ओमप्रकाश मेहता र जयप्रकाश मेहताको शव विराटनगरस्थित न्यूरो अस्पतालबाट निकालिएको छ।
पीडित परिवार र सरकारबीच शुक्रबार बिहान ७ बुँदे सहमति भएपछि मृतकका आफन्त शव बुझ्न तयार भएका हुन्। त्यसपछि अस्पतालमा राखिएको शव पोस्टमार्टमका लागि कोशी अस्पताल पठाइएको प्रहरीले जनाएको छ।
प्रहरीका अनुसार पोस्टमार्टम प्रक्रिया पूरा भएपछि दुवै शव अन्त्येष्टिका लागि आफन्तको जिम्मा लगाइनेछ।
गत आइतबार राति सुनसरीको देवानगञ्ज गाउँपालिका–३, कप्तानगञ्जमा भएको घटनाका क्रममा प्रहरीले चलाएको गोली लागेर स्थानीय ओमप्रकाश मेहता र जयप्रकाश मेहताको मृत्यु भएको थियो। त्यसयता शव न्यूरो अस्पतालमा राखिएको थियो।
सरकार र पीडित पक्षबीच भएको सहमतिपछि शव व्यवस्थापनको प्रक्रिया अघि बढाइएको हो।
