काठमाडौँ । प्रधानमन्त्री वालेन्द्र शाहले आज मध्यान्ह १२:०० बजे प्रधानमन्त्री तथा मन्त्रिपरिषद्को कार्यालय, सिंहदरबारमा पुँजी बजार, धितोपत्र व्यवसाय तथा बीमा क्षेत्रका सरोकारवालासँग विशेष छलफल गर्ने भएका छन्।
बैठकमा नेपाल धितोपत्र बोर्ड (सेबोन) का अध्यक्ष गोपाल भट्ट, नेपाल स्टक एक्स्चेन्ज (नेप्से) का अध्यक्ष अमृत लम्साल, स्टक ब्रोकर एशोसिएशन अफ नेपालका अध्यक्ष सागर ढकाल, नासा सेक्युरिटिजका सन्दीप जलान, नेप्सेका पूर्व प्रमुख कार्यकारी अधिकृत सीताराम थपलिया, नेपाल लाइफ इन्स्योरेन्सका प्रमुख नवराज सिलवाल, नागरिक स्टक डिलर कम्पनी लिमिटेडका प्रमुख कार्यकारी अधिकृत महेश्वर लाल श्रेष्ठ, प्रिया राज रेग्मी तथा अम्बिका प्रसाद पौडेल सहभागी हुने कार्यक्रम रहेको छ।
प्रधानमन्त्रीले पुँजी बजारको वर्तमान अवस्था, धितोपत्र व्यवसायको विकास, बीमा क्षेत्रको सुदृढीकरण, लगानीमैत्री वातावरण निर्माण तथा आवश्यक नीतिगत सुधारका विषयमा सरोकारवालाको सुझाव संकलन गर्ने कार्यक्रम रहेको जनाइएको छ।
यसैगरी बैठकमा समग्र राष्ट्रिय अर्थतन्त्रका समसामयिक चुनौती, वित्तीय क्षेत्रको स्थायित्व तथा पुँजी बजारलाई थप पारदर्शी, विश्वसनीय र प्रभावकारी बनाउने उपायबारे पनि विस्तृत छलफल हुने बताइएको छ।
