काठमाडौँ। काठमाडौँ महानगरपालिका–१८ स्थित तपिंताँ उद्यानमा काठमाडौँ महानगरपालिकाका पूर्वप्रमुख पिएल सिंहको प्रतिमा अनावरण भएको छ ।
आज यहाँ आयोजित कार्यक्रममा कार्यवाहक महानगरप्रमुख सुनिता डङ्गोलले प्रतिमा अनावरण गर्नुभयो । स्वर्गीय सिंहको प्रतिमा रु नौ लाख ३८ हजारको लागतमा निर्माण भएको हो ।
उक्त प्रतिमा मूर्तिकार श्याम तुलाधरले बनाउनुभएको हो । उक्त उद्यानमा १८ नं वडाले मनमोहन अधिकारी, मदन भण्डारी, पुष्पलाल श्रेष्ठ, पद्मरत्न तुलाधर र शङ्खधर साख्वाको प्रतिमा पनि राखेको छ ।
यसैगरी, किलागलमा स्वरसम्राट नारायण गोपाल, तुन्छे गल्लीमा कवि चित्तधर हृदय र वडा कार्यालयमा चन्द्रानन्द नेवाको प्रतिमा पनि स्थापना गरिएको छ । रासस
