काठमाडौँ। वेस्ट बैंकको दक्षिणी शहर हेब्रोनमा इजरायली सेनाले एउटा परिवार सवार सवारी साधनमाथि गोली चलाउँदा सात महिने एक प्यालेस्टिनी शिशुको मृत्यु भएको छ ।
प्यालेस्टिनी स्वास्थ्य मन्त्रालयले उक्त घटनाको पुष्टि गरेको हो । मन्त्रालयकाअनुसार दक्षिण हेब्रोनको तेल रुमैदा क्षेत्रमा इजरायली सेनाले चलाएको गोली लागेर साम फहद अबु हैकल नाम गरेका शिशु गम्भीर घाइते भएका थिए।
उनलाई तत्काल अस्पताल पु¥याइए पनि चिकित्सकहरूले मृत घोषित गरेका थिए । सोही घटनामा शिशुका बुबा र आमा समेत घाइते भएका छन्, जसको अवस्था मध्यम रहेको बताइएको छ ।
प्यालेस्टिनी आधिकारिक समाचार एजेन्सी ’वाफा’ का अनुसार शिशुका पिता बेथलेहेम विश्वविद्यालयमा प्राध्यापक हुन् । यो परिवार बेथलेहेममा बसोबास गर्दै आएको र हेब्रोनको मध्य भागमा रहेका आफन्तको घर जाने क्रममा सेनाको निशानामा परेको हो ।
यसैबीच, इजरायली रक्षा बल (आईडीएफ) ले शुक्रबार एक विज्ञप्ति जारी गर्दै उक्त घटनाबारे स्पष्टीकरण दिएको छ । आईडीएफले हेब्रोन क्षेत्रमा सैन्य कारबाहीका क्रममा एउटा सवारी साधन तिब्र गतिमा आफूतिर आएको देखेर सैनिकले प्रतिकार स्वरूप गोली चलाएको दाबी गरेको छ ।
प्रारम्भिक छानबिनबाट घाइतेहरू असंलग्न सर्वसाधारण रहेको खुलेको र घटनाको थप अनुसन्धान भइरहेको समेत इजरायली सेनाले स्वीकार गरेको छ । सिन्ह्वा/न्युज एजेन्सी नेपाल
