काठमाडौं । काठमाडौं महानगरपालिकाले सडक मानवमुक्त शहर बनाउने अभियानअन्तर्गत हालसम्म २ हजार ४२१ जना सडक मानवको उद्धार गरेको जनाएको छ। शुक्रबार आयोजित पत्रकार सम्मेलनमार्फत महानगरपालिकाले मानव सेवा आश्रमसँगको सहकार्यमा सडकमा जीवनयापन गरिरहेका व्यक्तिहरूको उद्धार, संरक्षण तथा पुनःस्थापनाको काम निरन्तर भइरहेको जानकारी दिएको हो।
महानगरपालिकाका प्रवक्ता नविन मानन्धरका अनुसार २०७४ साल मंसिर १ गतेदेखि २०८३ साल जेठ २१ गतेसम्म उद्धार गरिएका २ हजार ४२१ जनामध्ये १ हजार ५७१ पुरुष र ८५० महिला रहेका छन्।
उद्धार गरिएकामध्ये उमेर समूहअनुसार ५ वर्षसम्मका १० बालबालिका, ६ देखि १७ वर्ष उमेर समूहका ६३ जना, १८ देखि ३९ वर्ष समूहका ६५३ जना, ४० देखि ५९ वर्ष उमेर समूहका ८५४ जना तथा ६० वर्षमाथिका ८४१ जना रहेका छन्।
महानगरका अनुसार उद्धारपछि ८८३ जनालाई पारिवारिक पुनर्मिलन गराइएको छ, जसमा ४९४ पुरुष र ३८९ महिला रहेका छन्। त्यसैगरी ५३४ जनालाई सामाजिक पुनःस्थापना गरिएको छ, जसमा ३४७ पुरुष र १८७ महिला छन्।
प्रवक्ता मानन्धरले उद्धारपश्चात आश्रममै बसोबासका क्रममा ३२३ जनाको निधन भएको जानकारी पनि दिनुभयो। हाल मानव सेवा आश्रममा २०७ पुरुष र १३७ महिला गरी ३४४ जना आश्रित रहेको उहाँले बताउनुभयो।
उहाँका अनुसार उद्धार गरिएकामध्ये केही व्यक्तिहरूले आयआर्जनको माध्यमका रूपमा माग्ने कार्यलाई पेशा बनाएको समेत पाइएको छ।
काठमाडौं महानगरपालिकाले मानव सेवा आश्रमसँगको सहकार्यमा २०७६ साल मंसिर २९ गतेदेखि ‘सडक मानवमुक्त काठमाडौं’ अभियान सुरु गरेको थियो। महानगरले उक्त अभियानलाई निरन्तरता दिँदै सडकमा रहेका असहाय तथा बेवारिसे व्यक्तिहरूको उद्धार, संरक्षण र पुनःस्थापनालाई प्राथमिकतामा राख्दै आएको जनाएको छ।
