काठमाडौं । नेपाल सरकारले रासायनिक मलको वितरण तथा व्यवस्थापनसम्बन्धी किसानका गुनासा सुनुवाइ गर्न सबै प्रदेशका सम्बन्धित मन्त्रालयलाई सम्पर्क व्यक्ति (फोकल पर्सन) तोक्न निर्देशन दिएको छ।
कृषि, वन तथा वातावरण मन्त्रालयले सचिवस्तरीय निर्णयअनुसार सातै प्रदेशका कृषि तथा सहकारीसम्बन्धी मन्त्रालयलाई पत्राचार गर्दै यस्तो निर्देशन दिएको हो।
मन्त्रालयका अनुसार सरकारले किसानलाई अनुदानमा रासायनिक मल उपलब्ध गराउने नीति तथा कार्यक्रमलाई प्रभावकारी रूपमा कार्यान्वयन गर्न तथा मल आपूर्ति र वितरणलाई सहज, व्यवस्थित र पारदर्शी बनाउन यो व्यवस्था गर्न लागेको हो।
हाल देशभर विभिन्न मल वितरक कम्पनीमार्फत रासायनिक मल बिक्री तथा वितरण भइरहेको उल्लेख गर्दै मन्त्रालयले अनुदानको मल वितरण व्यवस्थापन कार्यविधि, २०८२ अनुसार प्रदेश मन्त्रालयहरूको भूमिका महत्वपूर्ण रहेको जनाएको छ।
पत्रमा प्रदेश मन्त्रालयहरूलाई रासायनिक मल वितरण तथा व्यवस्थापनसम्बन्धी किसानका गुनासा सम्बोधनका लागि एक जना सम्पर्क व्यक्ति तोकी त्यसको विवरण मन्त्रालयको वेबसाइटमा सार्वजनिक गर्न तथा संघीय कृषि, वन तथा वातावरण मन्त्रालयलाई समेत जानकारी गराउन अनुरोध गरिएको छ।
