काठमाडौँ। नेकपा (एमाले) ले प्रतिनिधि सभा नियमावलीको प्रश्तावित मस्यौदामा सत्तापक्षले संविधानको भावना विपरितका प्रावधानहरू राखेर जालझेल गरेको आरोप लगाएको छ ।
एमाले संसदीय दलको बैठकपछि सञ्चारकर्मीहरूसँग बोल्दै प्रमुख सचेतक ऐनबहादुर महरले नियमावलीको नियम, १४० मा उल्लेखित संविधान संशोधन सम्बन्धी व्यवस्थामा सत्तापक्षले ‘चिटिङ’ गरेको दाबी गर्नुभयो ।
आईतवार बस्ने प्रतिनिधि सभा बैठकमा नियमावली प्रश्तुत गर्ने कार्यसूची रहेको सन्दर्भमा प्रमुख सचेतक महरले मस्यौदा समितिमा भएको सहमतिलाई सत्तापक्षले उल्ट्याएको बताउनु भयो ।
उहाँकाअनुसार मस्यौदा समितिमा संविधान र मौजुदा नियमावलीकै व्यवस्थालाई मिलाएर लैजाने सहमति भएको थियो । तर सदनमा प्रश्तुत गरिने ड्राफ्टमा भने फरक विषय समेटिएको छ ।
उहाँले भन्नुभयो, ‘भोलि सदनमा प्रतिनिधिसभा नियमावली फाइनल्ली प्रश्तुत गर्ने जुन कार्यसूची रहेको छ, त्यसका बारेमा पनि हामीले केही छलफल गरेका छौँ । त्यसको खासगरी नियम १४० मा जुन संविधान संशोधनको विषय छ त्यो विषयमा केही ट्विस्ट गरेर केही चिटिङ गरेर सत्तापक्षले प्रश्तुत गरेको छ । मस्यौदा समितिमा म आफैँ स्वयं पनि थिएँ । त्यहाँ त्यस विषयमा बहस भएको थिएन । त्यसमा संविधान र मौजुदा नियमावलीमा भएको व्यवस्थालाई नै मिलाएर लैजाने भन्नेकुरा थियो तर पछि त्यो ड्राफ्ट गर्दा र त्यो हाउँसमा प्रश्तुत गर्दा त्यसलाई सच्याउने काम भएछ र अलिकति कन्फ्युजन क्रिएट गर्ने र खासगरी दुई वटा दुई वटा हाउसको संयुक्त सदनको दुई तिहाइ बहुमतले संविधान संशोधन गर्नसक्ने भन्ने त्यो भावको त्यो स्पिरिटको विषयवस्तु राख्न खोजेको जस्तो आभास हुन्छ । त्यो संविधान विरोधी छ । त्यो चिटिङ हो । त्यो सर्वथा बेठिक छ र त्यसको प्रतिरोध गर्ने भन्ने छ । त्यो सँगसँगै अब यो पछिल्लो समय मानवअधिकार आयोगले पनि एउटा रिपोर्ट प्रश्तुत एउटा प्रतिवेदन प्रश्तुत गरेको छ । यसका सन्दर्भमा यसका केही पक्षहरू राम्रा भएपनि समग्रमाका सन्दर्भमा पार्टीले एउटा दृष्टिकोण बनाउँछ । पार्टीको दृष्टिकोण आइसकेपछि त्यसलाई संसदीय दलले पनि पार्टीको दृष्टिकोणलाई बोक्ने भन्ने कुरा छ । यिनै विषयमा हाम्रो छलफल भयो ।’
यसैगरी, बैठकमा राष्ट्रिय मानवअधिकार आयोगले हालै सार्वजनिक गरेको प्रतिवेदनका सम्बन्धमा पनि छलफल भएको छ । प्रतिवेदनका केही पक्षहरू सकारात्मक भएपनि समग्र विषयवस्तुमा पार्टीले छुट्टै दृष्टिकोण बनाउने र सोही बमोजिम संसदीय दलले आफ्नो भुमिका तय गर्ने प्रमुख सचेतक महरले जानकारी दिनुभयो ।
राष्ट्रिय सभामा सदस्यहरूलाई बोल्नका लागि समय कम भएको भन्ने जिज्ञासामा महरले त्यस्तो समस्या नरहेको स्पष्ट पार्नुभयो । केही सदस्यहरूले व्यक्तिगत रूपमा समय थप गर्नुपर्ने माग राखेको भएपनि समग्रमा राष्ट्रिय सभामा समयको पर्याप्तता रहेको उहाँको भनाइ छ । उहाँले बरु प्रतिनिधि सभामासमयको अभाव महशुस भइरहेको उल्लेख गर्नुभयो । –न्युज एजेन्सी नेपाल
