काठमाडौँ। अस्ट्रियाको संसद्का अध्यक्ष वाल्टर रोजेनक्रान्जले चीन र अस्ट्रियाबीचको संसदीय आदानप्रदान तथा दुई देशबीचको स्वस्थ र स्थिर सम्बन्धको प्रशंसा गर्नुभएको छ ।
दुई देशबीच कूटनीतिक सम्बन्ध स्थापना भएको ५५ औँ वार्षिकोत्सवका अवसरमा आयोजित एक विशेष समारोहलाई सम्बोधन गर्दै उहाँले यस्तो धारणा राख्नुभएको हो ।
उक्त कार्यक्रममा अस्ट्रियाको नेशनल काउन्सिलका अध्यक्ष रोजेनक्रान्जले अस्ट्रिया र चीनबीचको सम्बन्धले हालसम्म सकारात्मक र स्थिर गति कायम गरेको बताउनु भयो ।
विशेषगरी दुवै देशका व्यवस्थापिकाबीच निकै निकटको सम्बन्ध रहेको उल्लेख गर्दै उहाँले सन् १९९२ यता दुई मुलुकबीच ६० भन्दा बढी पारस्परिक संसदीय भ्रमणहरू सम्पन्न भइसकेको जानकारी दिनुभयो ।
वर्तमान जटिल अन्तर्राष्ट्रिय परिस्थितिलाई दृष्टिगत गर्दै अध्यक्ष रोजेनक्रान्जले दुवै देशले आपसी सम्मानको परम्परालाई निरन्तरता दिनुपर्नेमा जोड दिनुभयो।
उहाँले विभिन्न क्षेत्रमा व्यावहारिक सहयोगलाई थप सुदृढ बनाउँदै द्विपक्षीय सम्बन्धको विकासलाई संयुक्त रूपमा अघि बढाउनुपर्ने बताउनु भयो ।
सोही अवसरमा अस्ट्रियाका लागि चिनियाँ राजदूत छि मेइले चीन र अस्ट्रियाले आपसी सम्मान र समानताका आधारमा राजनीतिक विश्वासलाई निरन्तर गहिरो बनाउँदै लगेको बताउनु भयो ।
उहाँले दुई देशबीच आर्थिक तथा व्यापारिक सहयोग विस्तार हुनुका साथै सांस्कृतिक र जनस्तरको सम्बन्धमा समेत वृद्धि भइरहेको उल्लेख गर्नुभयो ।
उक्त समारोहमा अस्ट्रिया–चीन द्विपक्षीय संसदीय समूहका सदस्यहरूका साथै विभिन्न क्षेत्रका प्रतिनिधिहरूको उल्लेख्य उपस्थिति रहेको थियो । सिन्ह्वाको/ न्युज एजेन्सी नेपाल
