काठमाडौँ। नेपाली राष्ट्रिय महिला भलिबल टोलीकी कप्तान निरुता ठगुन्नाले आगामी प्रतियोगिताका लागि टोलीको तयारी उत्साहजनक रहेको बताएकी छन् ।
छोटो समयको प्रशिक्षण भएपनि नयाँ र पुराना खेलाडीहरूबीचको उत्कृष्ट समन्वयले टोली सन्तुलित र बलियो बनेको उनले उल्लेख गरिन् । टोलीको तयारीबारे जानकारी दिँदै कप्तान ठगुन्नाले तयारी निकै राम्रो भइरहेको बताइन् ।
अनुभवी र युवा खेलाडीहरूको समिश्रणले टिममा राम्रो कम्बिनेसन मिलेको र आफ्नो उत्कृष्ट प्रदर्शन मैदानमा देखाउन आतुर रहेको बताइन् ।
घरेलु मैदानमा खेल्न पाउनु टोलीका लागि ठूलो अवसर र ऊर्जाको स्रोत भएको उनले बताइन् । नियमित रूपमा सोही मैदानमा अभ्यास गरिरहेकाले पनि खेलाडीहरूलाई वातावरणसँग घुलमिल हुन सहज भएको उनको भनाइ छ ।
नयाँ जिम्मेवारी र टोलीको नेतृत्वका विषयमा बोल्दै निरुताले कप्तानको रूपमा आफूलाई कुनै दबाब महशुस नभएको स्पष्ट पारिन् । टिमका सबै सदस्यहरू लामो समयदेखि सँगै खेल्दै आएका र प्रशिक्षकहरूको पूर्ण सहयोग रहेकाले पनि नेतृत्व गर्न सहज भएको उनले बताइन् ।
हाल टोलीलाई मुख्य प्रशिक्षकसहित तीन जना प्रशिक्षकहरूले प्रशिक्षण दिइरहेका छन् । नेपाली टोलीको मुख्य लक्ष्य भारतलाई पराजित गर्दै उपाधि हात पार्नु रहेको कप्तान ठगुन्नाले दृढता व्यक्त गरिन् ।
राष्ट्रिय टोली अहिले आफ्ना कमजोरीहरूलाई सुधार्दै र प्राविधिक पक्षमा केन्द्रित भएर अन्तिम तयारीमा जुटेको छ । कप्तान ठगुन्नाले खेलाडीहरूको अनुशासन, मेहनत र दर्शकको मायाले यस पटक नेपाली भलिबलले नयाँ इतिहास रच्ने विश्वास समेत व्यक्त गरेकी छन् ।
अर्को साताबाट शुरु हुने काभा महिला भलिबल च्याम्पियनसिपका लागि नेपाली टोलीमा निरुता ठगुन्नाको कप्तानीमा १४ सदस्यीय टोली घोषणा गरेको छ ।
प्रतियोगितामा सेन्ट्रल एशियाका नेपालसहित इरान, किर्गिस्तान, भारत, श्रीलंका, बंगलादेश, मालदिभ्स र कजाकिस्तानगरि कुल ८ राष्ट्र सहभागी रहेका छन् । सहभागी ८ राष्ट्रलाई २ समूहमा विभाजन गरिएको छ ।
जसअनुसार समूह ‘ए’ मा नेपाल सहित किर्गिस्तान, भारत र माल्दिभ्स तथा समूह ‘बी’ मा इरान, कजाकिस्तान, श्रीलंका र बंगलादेश रहेका छन् ।
च्याम्पियनसिप जेठ ८ गतेदेखि १५ गतेसम्म राष्ट्रिय खेलकुद परिषद्को कभर्ड हलमा हुनेछ । नेपाली टोलीको मुख्य प्रशिक्षकमा जगदीश भट्ट छन् ।
निरुता ठगुन्ना(कप्तान), सलिना श्रेष्ठ, शान्ति तामाङ, सुमित्रा रेग्मी, सुनिता खत्री, वसन्ती साउद, एलिशा मानन्धर, उषा भण्डारी, सलिना बुढा मगर, कामना विष्ट, रिमा कुवँर, मिना सुनार, प्रगति नाथ र जशना महतो टोलीमा परेका छन् । –न्युज एजेन्सी नेपाल
