काठमाडाैँ ।स्वास्थ्य बीमा सेवा सहज बनाउन भन्दै स्वास्थ्य बीमा बोर्डले सेवा प्रदायक स्वास्थ्य संस्थाहरूलाई डिजिटल कार्ड अनिवार्य रूपमा स्वीकार गर्न निर्देशन दिएको छ।
बबरमहलस्थित बोर्डले जारी गरेको परिपत्रअनुसार बिमितहरूले भौतिक बीमा कार्ड साथमा नरहेको अवस्थामा ‘नागरिक एप’, एचआइबी प्राेफाइल लगायत डिजिटल माध्यमबाट प्राप्त क्यूआर कोड स्क्यान गरी सेवा दिनुपर्ने व्यवस्था यसअघि नै लागू गरिएको थियो। उक्त निर्णय २०८० फागुन २४ गते बसेको बोर्ड बैठकबाट पारित भई परिपत्र समेत जारी भइसकेको बोर्डले जनाएको छ।
तर, केही स्वास्थ्य संस्थाहरूले अझै पनि डिजिटल कार्डमार्फत सेवा दिन आनाकानी गरेको भन्दै बोर्डमा गुनासो आउन थालेपछि अब यस व्यवस्थालाई कडाइका साथ कार्यान्वयन गर्न निर्देशन दिइएको हो।
बोर्डका वरिष्ठ मेडिकल सुपरिन्टेन्डेन्ट डा. पवन कुमार साहद्वारा जारी सूचनामा सबै सेवा प्रदायक स्वास्थ्य संस्थाहरूलाई डिजिटल कार्डमार्फत सेवा उपलब्ध गराउन अनिवार्य गरिएको उल्लेख छ। साथै, बिरामीको सहजताका लागि यस्तो व्यवस्था प्रभावकारी रूपमा कार्यान्वयन गर्न बोर्डले आग्रह गरेको छ।
स्वास्थ्य बीमा सेवा प्रवाहलाई प्रविधिमैत्री बनाउने उद्देश्यले लागू गरिएको यो व्यवस्था कार्यान्वयनमा नआउँदा बिमितहरूले सास्ती खेप्नुपरेको गुनासो बढ्दै गएको थियो।
