झापा। नेपाल पुलिस क्लब मेची रङ्गशालामा जारी प्रथम ‘ओम साई पाथिभरा चन्द्रगढी महिला गोल्डकप’ फुटबल प्रतियोगिताको क्वाटरफाइनलमा प्रवेश गरेको छ ।
निर्धारित ८० मिनेटको खेलमा उपाधि दाबेदार मानिएको पुलिसले आयोजक चन्द्रगढी युवा क्लबमाथि ६–० को सहज जित निकालेको हो ।
खेलको ‘प्लेयर अफ द म्याच’ रेखा पौडेल घोषित भइन् । उनले नगद ११ हजार रुपैयाँ पुरस्कार प्राप्त गरिन् । प्रतियोगिताअन्तर्गत क्वाटरफाइनलमा पुलिसले भारतको लक्ष्मीबाई स्पोट्र्स एकेडेमीसँग प्रतिस्पर्धा गर्नेछ । मङ्गलबार सशस्त्र प्रहरीको एपिएफ क्लब र ओखलढुङ्गाको पद्मा स्पोर्टिङ क्लबबीच खेल हुने आयोजकले जनाएको छ ।
प्रतियोगिताको विजेताले ११ लाख रुपैयाँ तथा उपविजेताले पाँच लाख रुपैयाँ पुरस्कार प्राप्त गर्नेछन् । सर्वोत्कृष्ट खेलाडीलाई नगद ५० हजार रुपैयाँ तथा उत्कृष्ट गोलकिपर, डिफेन्डर, मिडफिल्डर, फरवार्ड र प्रशिक्षकलाई जनही २५ हजार रुपैयाँ प्रदान गरिनेछ । रासस
