टोकियो। जापानको उत्तरी क्षेत्रमा सोमबार ७.५ म्याग्निच्युडको भूकम्प गएको छ भूकम्पका कारण सयौँ किलोमिटर टाढाको टोकियोका गगनचुम्वी भवनहरूलाई हल्लाएको छ र तीन मिटर (१० फिट) सम्म सुनामी छालहरू आउने चेतावनी दिइएको छ।
जापानको मौसम विज्ञान एजेन्सी (जेएमए) का अनुसार स्थानीय समयअनुसार साँझ ४ बजेर ५३ मिनेटमा उत्तरी इवाते प्रान्तको प्रशान्त महासागरमा भूकम्प गएको हो ।
भूकम्पको करिब ४० मिनेटपछि ८० सेन्टिमिटर (३१ इन्च) को सुनामीको लहर इवातेको कुजीस्थित एउटा बन्दरगाहमा ठोक्किएको छ ।
जेएमएले सुरुमा भूकम्पको धक्का ७.४ म्याग्निच्युडको रहेको बताएपनि यसलाई पछि परिमार्जन गरी ७.५ म्याग्निच्युड रहेको पुष्टि गरिएको हो ।
जेएमएद्वारा जारी चेतावनीमा भनिएको छ, “तटीय क्षेत्र र नदी किनारका क्षेत्रलाई खाली गरी उच्च स्थान वा उद्धार भवनजस्ता सुरक्षित स्थानमा तत्काल जान अनुरोध गरिन्छ।”
उहाँले भन्नुभयो, “पटक–पटक सुनामीको छाल आउने अपेक्षा गरिएको छ । चेतावनी नहटेसम्म सुरक्षित ठाउँ नछोड्नुहोस्,” विज्ञप्तिमा भनिएको छ।
राष्ट्रिय प्रसारक एनएचकेको फुटेजमा इवातेका बन्दरगाहका वरपरका धैरै स्थानमा तत्काल कुनै ठूलो क्षति नभएको उल्लेख गरिएको छ ।
जेएमएका एक अधिकारीले टेलिभिजनमार्फत् दिएको एक जानकारीमा विशेष गरी आगामी दुई देखि तीन दिनभित्र वा अर्को हप्तासम्ममा यस क्षेत्रमा थप केही ठूला भूकम्पहरू आउन सक्छन् र ती अझ कडा कम्पनहरू पनि हुन सक्नेछन् भनिएको छ ।
प्रधानमन्त्री कार्यालयले सङ्कट व्यवस्थापन टोली गठन गरेको जनाएको छ ।
जापानका प्रधानमन्त्री साने ताकाइचीले पत्रकारहरूसँगको भेटमा भन्नुभयो, “चेतावनी जारी गरिएको क्षेत्रमा बसोबास गर्ने नागरिकलाई कृपया उच्च र सुरक्षित स्थानहरूमा जान सूचना पु¥याउन समाचारहरूमार्फत् सहयोग गर्न आग्रह गर्दछु,”
जापान विश्वको भूकम्पीय दृष्टिकोणबाट सबैभन्दा सक्रिय तरङ्गहरू भएको देशहरूमध्ये एक हो । यो प्रशान्त महासागरको पश्चिमी किनारमा चार प्रमुख ‘टेक्टोनिक प्लेट’हरू, ‘रिङ अफ फायर’ को शीर्षमा स्थानमा रहेको छ।
करिब १२ करोड ५० लाख मानिस बसोबास गर्ने यस द्वीपसमूहमा हरेक वर्ष करिब एक हजार ५०० भूकम्पीय झट्का महशुस गरिने गर्छ र यो विश्वमा हुने भूकम्पको १८ प्रतिशत हिस्सा हो ।
उत्तरी तटमा ७.५ म्याग्निच्युडको कम्पन आएपछि २०२५ डिसेम्बरमा एक हप्ता लामो दोस्रो ‘शक्तिशाली भूकम्पको धक्का’ को सम्भावित चेतावनी जारी गरेको थियो।
डिसेम्बर ८ मा गएको भूकम्पले ७० सेन्टिमिटर (२८ इन्च) सम्म सुनामी छालहरू निम्त्याएको थियो र ४० भन्दा बढी व्यक्ति घाइते भएका थिए, तर कुनै ठूलो क्षति भएको थिएन । (रासस/एएफपी)
