काठमाडौँ । राष्ट्रिय जनमोर्चा पार्टीले राष्ट्रिय स्वतन्त्र पार्टी (रास्वपा) अमेरिकाद्वारा सञ्चालित शक्ति भएको आरोप लगाएको छ। मंगलबार काठमाडौंमा आयोजित एक कार्यक्रममा बोल्दै पार्टीका महासचिव मनोज भट्टले उक्त दाबी गरेका हुन्।
महासचिव भट्टले रास्वपाको परराष्ट्र नीति स्पष्ट नभएको भन्दै त्यसले अन्तर्राष्ट्रिय शक्तिको प्रभावमा परेर काम गर्न सक्ने जोखिम रहेको टिप्पणी गरे। उनले अमेरिकाले रास्वपालाई चीनविरोधी शक्तिका रूपमा प्रयोग गर्न सक्ने दाबी पनि गरे।
उनका अनुसार राष्ट्रिय जनमोर्चाले यस्ता सम्भावित प्रभावबारे निरन्तर खबरदारी गरिरहेको छ। उनले भने, “तपाईंहरू वास्तवमा अमेरिकाद्वारा सञ्चालित हुनुहुन्छ। परराष्ट्र नीतिको सवालमा स्पष्ट हुनुहुन्न। चीन विरोधी शक्तिका रूपमा अमेरिकाले तपाईंहरूलाई प्रयोग गर्ने हो। त्यो गर्न दिनु हुँदैन भनेर हामीले भनिरहेका छौँ। यदि त्यस्तो भएन भने त के भयो र? हामी नै गलत ठहरिउँला, देश बाँच्दछ नि। देश बाँचेर हामी गलत ठहरिँदा के बिग्रियो र? तर खबरदारी गरेनौँ भने समस्या हुन्छ।”
त्यसै कार्यक्रममा महासचिव भट्टले आगामी राजनीतिक सहकार्यका विषयमा पनि धारणा राख्दै राष्ट्रिय स्वतन्त्र पार्टीले पूर्वप्रधानमन्त्री पुष्पकमल दाहाल नेतृत्वको नेपाली कम्युनिस्ट पार्टीसँग सहकार्य गरेर अघि बढ्न सक्ने संकेत गरे।
उनले नेपाली कांग्रेस र नेकपा (एमाले) को जनाधार अझै पनि बलियो रहेको उल्लेख गर्दै ती दललाई कमजोर बनाउन अन्य शक्तिहरूबीच सहकार्य आवश्यक पर्न सक्ने धारणा व्यक्त गरे।
यसैबीच, राजनीतिक वृत्तमा विभिन्न दलबीचको सम्भावित समीकरण र सहकार्यबारे बहस पुनः चुलिएको छ।
