काठमाडौँ । नेपाल उद्योग वाणिज्य महासंघ (एफएनसीसीआई)को आसन्न निर्वाचनअन्तर्गत वस्तुगत तर्फका उपाध्यक्ष पदका उम्मेदवार शिवप्रसाद घिमिरेले उत्पादनमुखी र प्रविधिमैत्री अर्थतन्त्र निर्माणलाई आफ्नो मुख्य एजेण्डा बनाएको बताएका छन् ।
सोमबार काठमाडौंमा अञ्जन श्रेष्ठ समूहले आयोजना गरेको कार्यक्रममा बोल्दै घिमिरेले आत्मनिर्भर औद्योगिक संरचना विकासका लागि विशेष औद्योगिक नीति आवश्यक रहेको उल्लेख गरे । उनले त्यसका लागि निर्णायक पहल गर्ने प्रतिबद्धता जनाउँदै विश्वव्यापीकरणका कारण विकासशील मुलुकतर्फ उक्लिँदै गरेको नेपालमा साना तथा मझौला उद्योग क्षेत्र जोखिममा परेको बताए ।
उनले साना उद्योगको संरक्षणलाई प्राथमिकतामा राख्दै ठूला उद्योग र साना उद्योगीबीच सहकार्यको वातावरण निर्माण गरिने बताए । उत्पादन वृद्धि र प्रतिस्पर्धात्मक क्षमता अभिवृद्धिका लागि किसान, सहकारी र उद्योगबीच एकीकृत मूल्य शृंखला विकास गरिने उनको भनाइ छ । साथै, कृषिजन्य कच्चा पदार्थमा आधारित उद्योगलाई सहुलियतपूर्ण कर्जाको व्यवस्था गर्न पहल गर्ने उनले बताए ।
घिमिरेले पर्यटन क्षेत्रलाई कृषि, शिक्षा र स्वास्थ्यसँग जोडेर एकीकृत विकास मोडेल अघि बढाउने योजना समेत सार्वजनिक गरे । अवैध तथा अस्वस्थ प्रतिस्पर्धा नियन्त्रण गर्दै करको दायरा विस्तार र पूर्वानुमानयोग्य कर प्रणालीको वकालत गर्ने उनको भनाइ छ ।
युवा उद्यमशीलता प्रवर्द्धनलाई प्राथमिकतामा राख्दै स्टार्टअपका लागि सुरक्षित र प्रोत्साहनमूलक वातावरण निर्माण गरिने उनले बताए । प्रविधिमा आधारित व्यवसायलाई अन्तर्राष्ट्रिय स्तरमा प्रतिस्पर्धी बनाउन सम्बन्धित निकायसँग सहकार्य गरिने उनको प्रतिबद्धता छ ।
एफएनसीसीआईको आगामी चैत २९ र ३० गते हुने ६०औँ वार्षिक साधारणसभाले अध्यक्षबाहेक अन्य पदाधिकारी तथा कार्यकारिणी सदस्यहरूको चयन गर्नेछ ।
