काठमाडाैँ । राष्ट्रिय स्वतन्त्र पार्टी (रास्वपा) का सभापति रवि लामिछानेले आफ्ना सांसदहरूलाई मन्त्री बन्नका लागि कुनै पनि प्रकारको लबिङ वा ‘मिडिया ट्रायल’ नगर्न स्पष्ट निर्देशन दिएका छन् ।
बुधवार आयोजित सांसदहरूको अभिमुखीकरण कार्यक्रमको समापन गर्दै उहाँले सरकारमा जाने विषयलाई लिएर सार्वजनिक रूपमा जथाभावी अभिव्यक्ति नदिन सचेत गराएका हुन्।
रास्वपाले प्राप्त गरेको अभूतपूर्व जनमतका कारण सरकारमा सहभागी हुने सम्भावना बढेसँगै सांसदहरूबिच मन्त्री बन्ने आकांक्षा देखिनु स्वाभाविक भए पनि त्यसलाई मिडियामा प्रचारको विषय नबनाउन उनले जोड दिए।
सभापति लामिछानेले पार्टीले कसलाई सरकारमा पठाउने भन्ने विषयमा हालसम्म कुनै निर्णय नगरेको जानकारी दिँदै मन्त्री छनोटको आधार व्यक्तिको क्षमता र विज्ञता हुने स्पष्ट पारे। कसैले पनि व्यक्तिगत रूपमा भनसुन वा दबाब दिन आवश्यक नरहेको उनको भनाइ थियो।
उनका अनुसार मिडियामा धेरै देखिने र नदेखिने दुवैथरी सांसदहरूको मूल्याङ्कन पार्टीले गरिरहेको छ। “तपाईंहरूमध्ये केही साथीहरूले मन्त्रालयको जिम्मेवारी सम्हाल्नुहुनेछ, तर ‘मन्त्री बनाइदिनुस्’ भनेर वा ‘म फलानो मन्त्री’ भन्दै मिडियामा प्रचार गर्ने काम बन्द गर्नुस्,” उनले भने ।
लामिछानेले सांसदहरूलाई चुनावका बेला जनतासँग गरिएको प्रतिवद्धता पत्र पुनः अध्ययन गर्न निर्देशन दिँदै मन्त्री बन्ने दौडभन्दा पनि जनताको दैनिक जीवन सुधारमा ध्यान केन्द्रित गर्न आग्रह गरे। उनले जनताको चुलो कसरी बल्छ र जीवनस्तर कसरी उकासिन्छ भन्ने विषयलाई प्राथमिकतामा राख्नुपर्नेमा जोड दिए।
